जळगाव ( प्रतिनिधी ) – नवरात्री उत्सवाचे औचित्य साधून शिव कॉलनी परिसर मित्र मंडळाच्या वतीने सामाजिक बांधिलकी जपत भव्य रक्तदान शिबिराचे आयोजन करण्यात आले होते. या शिबिराला परिसरातील नागरिक आणि सामाजिक कार्यकर्त्यांचा उस्फूर्त प्रतिसाद मिळाला असून, एकूण ६५ रक्तदात्यांनी रक्तदान करून सामाजिक उत्तरदायित्व पार पाडले.
या प्रसंगी प्रमुख उपस्थिती म्हणून नगरसेविका अंकिता पंकज पाटील यांनी हजेरी लावली. त्यांनी उपक्रमाचे कौतुक करत, “सण-उत्सव हे केवळ आनंदापुरते मर्यादित न ठेवता सामाजिक भावनेतून असे उपक्रम राबवणे ही अत्यंत अभिमानास्पद बाब आहे,” असे मनोगत व्यक्त केले. तसेच त्यांनी शिबिरातील रक्तदात्यांचे व आयोजकांचे विशेष अभिनंदन केले.
शिबिरात परिसरातील अनेक तरुण व ज्येष्ठ सामाजिक कार्यकर्त्यांनी पुढे येऊन रक्तदान केले. उपक्रमात सहभागी झालेल्या सर्व रक्तदात्यांना प्रमाणपत्र देऊन गौरविण्यात आले. हे रक्तदान शिबिर यशस्वी पार पाडण्यासाठी शिव कॉलनी परिसर मित्र मंडळाचे सर्व पदाधिकारी, सदस्य व कार्यकर्त्यांनी अथक परिश्रम घेतले. मंडळाच्या या सामाजिक उपक्रमाचे संपूर्ण परिसरातून विशेष कौतुक होत आहे.
