पुणे येथे गेले असताना डल्ला; कडी-कोयंडा कापून चोरट्यांचा शिरकाव
शिरसोली (प्रतिनिधी) :- जळगाव तालुक्यातील शिरसोली प्र.बो. येथे एका बंद घराचे कुलूप तोडून अज्ञात चोरट्यांनी सुमारे पाच लाख रुपये किमतीचा सोन्या-चांदीचा ऐवज आणि रोख रक्कम लंपास केल्याची घटना उघडकीस आली आहे. ही चोरी शिक्षक कॉलनीतील स्टॅम्प वेंडर राजेंद्र दौलत आंबटकर (बारी) यांच्या घरात झाली असून, या घटनेमुळे परिसरात खळबळ उडाली आहे.
मिळालेल्या माहितीनुसार, स्टॅम्प वेंडर राजेंद्र आंबटकर हे पत्नीसह गेल्या शुक्रवारी (१ मे) पुणे येथे गेले होते. दरम्यान, त्यांचे घर बंद असल्याची संधी साधत अज्ञात चोरट्यांनी घराचा कडी-कोयंडा कापून आत प्रवेश केला. आज मंगळवारी सकाळी ७ वाजेच्या सुमारास आंबटकर कुटुंब घरी परतले असता, त्यांना दरवाजा अर्धवट उघडा असल्याचे दिसले. घरात प्रवेश केल्यानंतर सर्व सामान अस्ताव्यस्त पडलेले दिसले, तेव्हा चोरी झाल्याचे त्यांच्या लक्षात आले.
दरम्यान चोरट्यांनी घरातील धान्याच्या कोठीत लपवून ठेवलेले दागिने शोधून काढले. यात प्रामुख्याने खालील वस्तूंचा समावेश आहे:
दोन तोळ्यांची सोन्याची मंगलपोत दीड तोळ्याची सोन्याची चेन ५ ग्रॅमचे सोन्याचे झुमके १५ हजार रुपयांची रोख रक्कम असा एकूण अंदाजे ५ लाख रुपयांचा ऐवज चोरट्यांनी लंपास केला आहे.
घटनेची माहिती मिळताच सामाजिक कार्यकर्ते तथा माजी सरपंच पती अर्जुन पवार यांनी एमआयडीसी पोलीस ठाण्याला पाचारण केले. घटनेचे गांभीर्य ओळखून एमआयडीसी पोलीस स्टेशनचे पीएसआय राहुल तायडे, प्रदीप चौधरी, धनराज गुळवे, चेतन पाटील आणि शिरसोलीचे पोलीस पाटील श्रीकृष्ण बारी यांनी घटनास्थळी धाव घेऊन पंचनामा केला.
तपासाला गती देण्यासाठी पोलीस कर्मचारी मनोज पाटील आणि नाना मोरे यांनी ‘चॅम्प’ या श्वान पथकाला पाचारण केले होते. तसेच ठसे तज्ज्ञ एपीआय पांडुरंग फळ आणि पोलीस हेडकॉन्स्टेबल सचिन चौधरी यांनी घटनास्थळावरून फिंगरप्रिंट्स घेतले आहेत. याप्रकरणी एमआयडीसी पोलीस ठाण्यात गुन्हा दाखल करण्याची प्रक्रिया सुरू असून पोलीस अधिक तपास करत आहेत.
