महापौरांनी दिल्या सूचना : आरोग्य निरीक्षकांची घेतली बैठक
जळगाव (प्रतिनिधी) – मनपाच्या आरोग्य, मलेरिया विभागातील सर्वांनी कोविड काळात प्रामाणिकपणे काम केले आहे. रोगराई टाळण्यासाठी आपण स्वतःची काळजी घेत शहरात योग्य स्वच्छता राखावी. करावी. उद्या दि.२ ऑक्टोबर महात्मा गांधी जयंतीपासून शहराचा कानाकोपरा कसा स्वच्छ ठेवता येईल, यासाठी प्रत्येकाने कामाला लागावे, अशा सूचना महापौर भारती सोनवणे यांनी दिल्या.
गुरुवारी महापौर भारती सोनवणे यांनी आपल्या दालनात सर्व आरोग्य निरीक्षकांची बैठक घेतली. बैठकीला नगरसेवक कैलास सोनवणे, सदाशिव ढेकळे, उपायुक्त पवन पाटील उपस्थित होते. शहरात स्वच्छता करताना प्रत्येकाने मास्क आणि हँडग्लोज वापरणे आवश्यक आहे. प्रत्येकाला मास्क आणि हँडग्लोज उपलब्ध व्हावे यासाठी महापौरांनी आरोग्य विभागाला सूचना देत ५०० मास्क, १००० हँड ग्लोज, सॅनिटायझर तात्काळ उपलब्ध करून देण्याचे सांगितले.
