जळगाव बसस्थानकावर पुन्हा चोरीचा प्रकार
जळगाव (प्रतिनिधी) – शहरातील नवीन बसस्थानकात बसमध्ये चढत असताना, शेतकऱ्याच्या खिशातून ३५ हजार रुपयांची रोकड अज्ञात चोरट्यांनी लांबविल्याची घटना बुधवारी दि. ७ ऑगस्ट रोजी दुपारी ३ वाजता घडली. या प्रकरणी जिल्हापेठ पोलिस ठाण्यात अज्ञात चोरट्यांविरुध्द गुन्हा दाखल करण्यात आला आहे.
शालीग्राम तुकाराम पाटील (वय ६५, रा.सामरोद, ता.जामनेर) हे बुधवारी जळगाव शहरात कामानिमित्त आले होते. दुपारी काम संपल्यानंतर दुपारी २.३० वाजता जळगाव बसस्थानकात आले. त्या ठिकाणाहून दुपारी ३ वाजता जामनेर बसमध्ये चढत होते. (केसीएन)तेव्हा त्यांच्या खिशातून ३५ हजार रुपयांची रोकड चोरट्यांनी लांबवून नेली. बसमध्ये बसल्यानंतर खिशातील रक्कम चोरून नेल्याचा प्रकार त्यांच्या लक्षात आला. त्यांनी बसमधून उतरून थेट जिल्हापेठ पोलिस ठाण्यात धाव घेतली. या प्रकरणी शालीग्राम पाटील यांच्या फिर्यादीवरुन अज्ञात चोरट्याविरुध्द गुन्हा दाखल करण्यात आला आहे.दरम्यान, बसस्थानक हे चोरट्यांचे आवडीचे झालेले आहे. याठिकाणी चोऱ्या थांबण्याचे नाव घेत नाही.
