महसूल अधिकाऱ्याच्या फिर्यादीवरुन तिघांवर गुन्हा दाखल
जळगाव (प्रतिनिधी) :- शासनाकडून एकाच व्यक्तीला वास्तव्य करण्यासाठी शासकीय जागा उपलब्ध करून देण्यात आली होती; मात्र शासकीय नियमांचा भंग करून, त्या जागेवर अपार्टमेंट बांधून इतर रहिवाशांचेही वास्तव्य सुरू झाले. या प्रकरणी नियम व अटींचा भंग केल्याप्रकरणी याठिकाणी वास्तव्यास असलेल्या रहिवाशांवर रामानंदनगर पोलिस ठाण्यात गुन्हा दाखल करण्यात आला आहे.
फिर्यादीने दिलेल्या माहितीनुसार, शासनाकडून काही जागा काही सामाजिक संघटना व संस्थांना दिल्या जातात. शहरातील पिंप्राळा भागातही एक जागा देण्यात आली होती; मात्र या जागेवर ज्या व्यक्तीला ही जागा देण्यात आली होती. त्याच व्यक्तीला वास्तव्यास परवानगी होती; मात्र नंतर त्याच जागेवर अपार्टमेंट तयार करून तीन जणांचे वास्तव्य झाले आहे. या ठिकाणी वास्तव्यास असलेल्यांना महसूल प्रशासनाने नोटीस बजावली होती; मात्र नोटिसीनंतरही घरं मोकळी न केल्याने या प्रकरणी पिंप्राळ्याचे ग्राम महसूल अधिकारी राजू बाऱ्हे यांच्या फिर्यादीवरून मोहन विश्वास पाटील, दुर्गा रमेश पाटील, जितेंद्र भागवत पाटील यांच्यावर रामानंदनगर पोलिसात गुन्हा दाखल केला आहे.
