जळगाव लाचलुचपत प्रतिबंधक विभागाची कारवाई
जळगाव (प्रतिनिधी) : सातबारा उताऱ्यावर नाव लावण्याच्या मोबदल्यात ५ हजारांची लाच स्विकारणाऱ्या पिंप्राळा येथील मंडळाधिकाऱ्याला लाचलुचपत विभागाच्या पथकाने रंगेहात पकडले आहे. या कारवाईमुळे महसूल विभागात एकच खळबळ उडाली आहे. याप्रकरणी रामानंदनगर पोलीस ठाण्यात गुन्हा दाखल करण्यात आला आहे.
किरण खंडू बाविस्कर (वय-४७, रा. पिंप्राळा, जळगाव) असे लाच घेणाऱ्या मंडळाधिकाऱ्याचे नाव आहे. तक्रारदार हे जळगाव तालुक्यातील सावखेडा गावात राहिवाशी आहेत. सातबारा उताऱ्यावरून तक्रारदार यांच्या वडिलांचे व आते भावाचे नाव कमी करून आईचे नाव लावण्यासाठी त्यांनी पिंप्राळा येथील तलाठी कार्यालयात दि. १६ मे रोजी अर्ज केला होता. त्यानंतर २० मे रोजी तलाठी कार्यालयात येऊन या प्रकरणाची चौकशी केली असता मंडळाधिकारी किरण बाविस्कर यांनी तक्रारदार यांच्याकडे १० हजाराची लाचेची मागणी केली.
त्यानंतर तक्रारदार यांनी २७ मे रोजी जळगाव येथील जळगाव येथील लाचलुचपत प्रतिबंधक विभागाकडे कार्यालयात येवून तक्रार दिली. त्यानुसार पथकाने गुरूवारी दि. ६ जून रोजी सापळा रचून मंडळाधिकारी किरण बाविस्कर हे ५ हजारांची लाच घेत असतांना पथकाने रंगेहात पकडले. या कारवाईमुळे जळगाव शहरातील महसूल विभागात खळबळ उडाली आहे. याप्रकरणी रामानंदनगर पोलीस ठाण्यात गुन्हा दाखल करण्यात आला आहे.
