जळगाव ( प्रतिनिधी ) – आकाशवाणी चौकातील तापी पाटबंधारे महामंडळ विश्राम गृहाच्या कुंपण भिंतीचे अतिक्रमण महामंडळाने स्वतः सात दिवसात काढून घ्यावे अन्यथा महापालिकेतर्फे ते काढण्यात येईल असा इशारा मनपा आयुक्त सतीश कुलकर्णी यांनी अधीक्षक अभियंता यांना नोटिसीतून दिला आहे.
आकाशवाणी चौकातील तापी पाटबंधारे महामंडळ विश्रामगृहाचे कुंपण भिंतीचे अतिक्रमण काढण्यात यावे अशी मागणी सामाजिक कार्यकर्ते दिपककुमार गुप्ता यांनी मनपा आयुक्त सतीश कुलकर्णी यांच्याकडे केली होती. मनपाने मोजमाप करून तापी महामंडळाला अतिक्रमित भिंत काढण्याबाबत कळविले होते. मात्र तापी महामंडळाने कुठलीच कारवाई न केल्याने मनपा आयुक्तांनी सात दिवसात अतिक्रमित भिंत काढण्याचे पत्र अधीक्षक अभियंता यांना दिले आहे.
तापी पाटबंधारे महामंडळाच्या अतिक्रमीत भिंतीचे बांधकाम काढुन सर्व्हिस रोडची जागा मोकळी करुन द्या राष्ट्रीय महामार्गाचे रुंदीकरण व नुतनीकरणाचे कार्य प्रगतीपथावर आहे महामार्गाचे सर्व्हिस रोडचे काम करुन घेणे सुलभ होण्यासाठी कुंपण भिंतीचे काम काढणे आवश्यक आहे. याबाबत दिपककुमार गुप्ता यांनी पुनश्च पत्र दिलेले आहे. उपरोक्त कार्यवाहीने सार्वजनिक हित साध्य होणार असल्याने कुंपण भिंतीचे बांधकाम ७ दिवसाचे आत काढावे. अन्यथा महानगरपालिकेमार्फत अतिक्रमण काढण्यात येईल असे महापालिकेने बजावले आहे .
