श्री सिद्धेश्वर महादेव मंदिर संस्थानतर्फे आयोजन, आ. राजूमामा भोळे यांची उपस्थिती
जळगाव (प्रतिनिधी) :- येथील श्रीकृष्ण कॉलनी परिसरात श्री सिद्धेश्वर महादेव मंदिर संस्थानतर्फे जळगाव लोकसभा मतदारसंघाच्या खा. स्मिताताई वाघ यांना नुकताच संसदरत्न जाहीर झाल्याबद्दल नागरिकांच्या वतीने जाहीर सत्कार करण्यात आला. या वेळेला आ. राजूमामा भोळे यांची अध्यक्षस्थानी उपस्थिती होती.
लोकसभा, राज्यसभा सचिवालयाच्या आकडेवारीवरून प्राईम पॉईंट फाउंडेशन या संस्थेकडून ‘संसदरत्न’ पुरस्कार दरवर्षी प्रदान केले जातात. लोकसभेत उत्कृष्ट कामगिरी करणाऱ्या सदस्यांचा गौरव केला जातो. यात संसद रत्न म्हणून जळगावच्या खा. स्मिताताई वाघ यांचा समावेश आहे. या यशाबद्दल श्री सिद्धेश्वर महादेव मंदिर संस्थानतर्फे यांचा ज्येष्ठ नागरिक अविनाश नेहेते यांच्या हस्ते सत्कार करण्यात आला. यावेळी प्रमुख पाहुणे म्हणून भाजपाचे महानगर जिल्हाध्यक्ष दीपक सूर्यवंशी, माजी नगरसेवक प्रा. सचिन पाटील उपस्थित होते.
यावेळी आ. राजूमामा भोळे यांनी त्यांच्या आमदार निधीतून खुल्या जागेला संरक्षण भिंत बांधण्यासाठी रुपये १० लाख देण्याची घोषणा केली. तसेच उर्वरित शौचालय, पेव्हर ब्लॉक बांधकामासाठी प्रस्ताव सादर करण्यात आल्याची माहिती देखील त्यांनी दिली. विद्यार्थी दशेपासून कायम सामाजिक, राजकीय, सांस्कृतिक, शैक्षणिक अशा विविध क्षेत्रात स्मिताताईंनी काम केले. त्यामुळे आता जनतेने त्यांना खासदार देखील केले. एवढेच नव्हे तर लोकसभेत देखील आपल्या कर्तुत्वाचा ठसा उमटवल्यामुळे त्यांना संसदरत्न’ पुरस्कार जाहीर झाला, अशी प्रतिक्रिया यावेळी अध्यक्षस्थानावरून आ. राजूमामा भोळे यांनी दिली.
प्रास्ताविक अ. वा. जाधव यांनी तर सूत्रसंचालन जयेश कुलकर्णी यांनी केले. आभार अविनाश नेहेते यांनी मानले. यावेळी हितेंद्र धांडे, उमेश पाटील, मिलिंद काळे, नितीन अत्तरदे, राजू शिंदे, उन्नती कुलकर्णी, ज्योत्स्ना धांडे, विमल धांडे आदींनी परिश्रम घेतले.
