यावल तालुक्यातील ७ ते ८ जणांवर गुन्हा दाखल
यावल (प्रतिनिधी):- साकळी (ता. यावल) येथे मुलांच्या किरकोळ वादाचे रूपांतर मोठ्या संघर्षात होऊन दोन गटात जोरदार हाणामारी झाल्याची घटना २९ मार्च रोजी रात्री घडली. या घटनेत एकाच कुटुंबातील सदस्यांना लाठ्या-काठ्या आणि लोखंडी हुकने गंभीर मारहाण करण्यात आली असून, जखमींवर जळगाव येथील शासकीय रुग्णालयात उपचार सुरू आहेत.
फिर्यादी शिवदास शेनपडू पाटील (वय ६२, रा. थोरगव्हाण ता. यावल) हे सध्या थोरगव्हाण येथे आपल्या कुटुंबासह राहतात. २९ मार्च रोजी सकाळी त्यांचा लहान मुलगा संभाजी हा साकळी येथे बाजारात गेला असता, त्याचा अमोल भगवत पाटील याच्याशी किरकोळ वाद झाला. या वादाचा राग मनात धरून रात्री ९ वाजेच्या सुमारास संशयित आरोपी अमोल भगवत पाटील, दिगंबर संतोष पाटील, अक्षय अशोक पाटील व इतर काही जणांनी फिर्यादींच्या घरावर चाल केली. संशयितांनी फिर्यादींच्या घरात शिरून शिवीगाळ करण्यास सुरुवात केली. वाद सोडवण्यासाठी आलेले फिर्यादींचे लहाण भाऊ माणिक शेनपडू पाटील यांना संशयितांनी लाकडी दांडक्याने व लोखंडी हुकने बेदम मारहाण केली. यात माणिक पाटील यांच्या डोक्याला, पाठीला आणि हाताच्या बोटांना गंभीर मोठी दुखापत झाली आहे.
तसेच फिर्यादींचा मुलगा संदीप यालाही लाथाबुक्क्यांनी मारहाण करण्यात आली. घटनेनंतर जखमींना तातडीने यावल ग्रामीण रुग्णालयात नेण्यात आले, मात्र प्रकृती चिंताजनक असल्याने त्यांना पुढील उपचारासाठी जळगाव येथील जिल्हा सामान्य रुग्णालयात (सिव्हिल हॉस्पिटल) हलवण्यात आले आहे. याप्रकरणी शिवदास पाटील यांनी दिलेल्या फिर्यादीवरून यावल पोलीस ठाण्यात अमोल भगवत पाटील, दिगंबर संतोष पाटील, अक्षय अशोक पाटील यांच्यासह इतर साथीदारांविरुद्ध विविध कलमान्वये गुन्हा दाखल करण्यात आला आहे. घटनेचा पुढील तपास पोलीस करत आहेत.
