जळगाव (प्रतिनिधी) – शासकीय वैद्यकीय महाविद्यालय व रुग्णालय, जळगावचे अधिष्ठाता डॉ. जयप्रकाश रामानंद यांच्या जागी राज्य शासनाने नागपूर येथील डॉ. मिलिंद फुलपाटील यांची केलेली नियुक्ती रद्द करावी अशी मागणी शिवसेनेचे प्रभाग समिती सभापती तथा नगरसेवक प्रवीण कोल्हे व नगरसेविका मीनाताई धुडकू सपकाळेयांनी केली आहे. त्याबाबत सविस्तर निवेदन पालकमंत्री ना. गुलाबराव पाटील यांना देण्यात येणार आहे.
शासकीय वैद्यकीय महाविद्यालय व रुग्णालय, जळगावचे अधिष्ठाता डॉ. जयप्रकाश रामानंद यांच्या जागी नागपूर येथील डॉ. मिलिंद फुलपाटील यांची अधिष्ठातापदी नियुक्ती राज्य शासनाच्या वैद्यकीय शिक्षण व औषधी द्रव्ये विभागाने दि. २६ ऑगस्ट रोजी केली आहे. त्याबाबतचा आदेश पारित झाला आहे.
डॉ. जयप्रकाश रामानंद यांनी १३ जून २०२० साली शासकीय वैद्यकीय महाविद्यालय व रुग्णालय, जळगावचा अधिष्ठाता पदाचा अतिरिक्त कार्यभार स्वीकारला होता. त्या वेळेला अत्यंत बिकट आणि दयनीय अवस्था शासकीय वैद्यकीय महाविद्यालय व रुग्णालय, जळगावची झाली होती. गेल्या सव्वा वर्षापासून डॉ. रामानंद यांनी महाविद्यालय व रुग्णालयाचा पूर्ण कायापालट करून रुग्णसेवेचा दर्जा उंचावला. रुग्णांना वैद्यकीय सेवा मिळण्यासाठी कुठलीही अडचण होऊ नये यासाठी स्वतंत्र कार्यपद्धती आणि व्यवस्थापन तयार केले. दिव्यांग बांधवांना प्रमाणपत्र मिळण्याची कार्यवाही सोपी व्हावी यासाठी पारदर्शक कुपन प्रणाली सुरू केली. यासह अनेक चांगले बदल ‘न भूतो न भविष्यती’ या प्रकारे डॉ. जयप्रकाश रामानंद यांनी केले. त्यामुळे पूर्ण महाराष्ट्रात जळगावचा नावलौकिक झाला.
या बाबी लक्षात घेता वैद्यकीय शिक्षण व औषधी द्रव्ये विभागाने डॉ. मिलिंद फुलपाटील यांची जळगावची बदली रद्द करून डॉ. जयप्रकाश रामानंद यांना कायम ठेवावे, अशी मागणी प्रवीण कोल्हे व मीनाताई सपकाळे यांनी केली आहे.
