पाल येथे वन विभागाची धडक कारवाई
रावेर (प्रतिनिधी) :- यावल अभयारण्यातील पाल परिसरात वन विभागाने अवैध वाळू उत्खनन व वाहतुकीविरोधात मोठी कारवाई करत स्थानिक वाळू माफियांना जोरदार दणका दिला आहे. सुकी नदी पात्रातून चोरट्या पद्धतीने वाळू वाहतूक करणाऱ्या टोळीवर छापा टाकत, ट्रॅक्टरसह एक आरोपी ताब्यात घेण्यात आला आहे.
दि. १२ जुलै रोजी वन विभागाला मिळालेल्या गुप्त माहितीनुसार, पाल परिमंडळातील कक्ष क्रमांक ५४ मधील सुकी नदी पात्रात अवैधरित्या वाळू उत्खनन सुरू असल्याचे समजले. यावरून वन विभागाच्या पथकाने तात्काळ घटनास्थळी धाव घेत शब्बीर बलदार तडवी (वय ४५) या आरोपीस ट्रॅक्टर (एमएच १९ बीजी ६९३०) व वाळू भरलेल्या ट्रॉलीसह ताब्यात घेतले. या कारवाईदरम्यान एकूण दोन लाख रुपयांचा मुद्देमाल जप्त करण्यात आला आहे.
ही कारवाई उपवनसंरक्षक (वन्यजीव) नाशिक कृष्णा भवर, सहाय्यक वनसंरक्षक सत्यजीत निकत (यावल अभयारण्य), मंगेश शर्मा आणि वनपरिक्षेत्र अधिकारी शितल नगराळे यांच्या मार्गदर्शनाखाली पार पडली. कारवाईमध्ये वनपाल संभाजी सूर्यवंशी, प्रविण पाटील, वनरक्षक रोहिदास पाटील, जगदीश बारेला, संजय बारेला, रणधीर काटे, राजमल बारेला, सविता बारेला, सकिना तडवी, धनाबाई भादले आणि वनमजूर परमान तडवी, युसूफ खान यांनी केली.
