समाजसेवक रमेशकुमार मुनोत यांच्याकडून पांजरापोळ संस्थेला १०० जलकुंडांची भेट
जळगाव, (प्रतिनिधी) : वाढत्या उन्हाच्या तीव्रतेमुळे तहानलेल्या मुक्या जीवांच्या मदतीसाठी पुढाकार घेत ओम् साई रिअल इस्टेट कन्सल्टंट्सचे संचालक तथा समाजसेवक रमेशकुमार मुनोत यांनी जळगाव येथील पांजरापोळ संस्थेला १०० जलकुंडांची भेट देत सामाजिक बांधिलकीचा आदर्श निर्माण केला आहे. या उपक्रमामुळे गाय, वासरे तसेच इतर जनावरांना उन्हाळ्यात स्वच्छ पिण्याचे पाणी उपलब्ध होण्यास मोठी मदत होणार आहे.
जिल्ह्यात यंदा तापमानाने अनेकदा ४५ अंश सेल्सिअसचा टप्पा ओलांडल्याने पशू-पक्ष्यांच्या पिण्याच्या पाण्याची समस्या गंभीर बनली होती. या पार्श्वभूमीवर केवळ चिंता व्यक्त न करता प्रत्यक्ष कृती करत रमेशकुमार मुनोत यांनी पशू-पक्ष्यांसाठी परळ आणि जलकुंडांचे मोफत वितरण सुरू केले.
या उपक्रमाला नागरिकांकडून उत्स्फूर्त प्रतिसाद मिळत असून, गेल्या दीड महिन्यात ५०० हून अधिक परळ आणि ५०० हून अधिक जलकुंडांचे मोफत वितरण करण्यात आले आहे. शहरासह ग्रामीण भागातील अनेक ठिकाणी या साहित्यामुळे पक्षी आणि जनावरांसाठी पाण्याची कायमस्वरूपी व्यवस्था निर्माण झाली आहे.
रमेशकुमार मुनोत यांचे कार्य हे केवळ सामाजिक मदतीपुरते मर्यादित नसून पर्यावरण संवर्धन आणि प्राणीमात्रांविषयी असलेल्या संवेदनशीलतेचे प्रतीक मानले जात आहे. त्यांच्या या उपक्रमातून समाजात पर्यावरणपूरक विचारांची जाणीव निर्माण होत असून नागरिकांनाही अशा कार्यात सहभागी होण्याची प्रेरणा मिळत आहे.
मुक्या जीवांना पाण्याचा एक थेंब उपलब्ध करून देणे हीदेखील मोठी समाजसेवा ठरू शकते, हा संदेश या उपक्रमातून अधोरेखित झाला आहे. रमेशकुमार मुनोत यांच्या या सामाजिक कार्याचे विविध स्तरांतून कौतुक होत असून, अधिकाधिक नागरिकांनी पशू-पक्ष्यांच्या संरक्षणासाठी आणि पर्यावरण संवर्धनासाठी पुढाकार घ्यावा, अशी अपेक्षा व्यक्त केली जात आहे.
