राजकीय वर्तुळात जोरदार चर्चा
जळगाव (प्रतिनिधी) : शहराचे माजी आमदार सुरेशदादा जैन यांनी शिवसेना ठाकरे गटाच्या सदस्यत्वाचा राजीनामा दिला. त्यानंतर राजकारणातून निवृत्त होण्याचे देखील त्यांनी सांगितले. मात्र लवकरच ते जळगाव व रावेर लोकसभा मतदारसंघातील भारतीय जनता पक्षाच्या दोन्ही उमेदवारांना जाहीर पाठिंबा देणार असल्याची माहिती समोर आली आहे. यामुळे राजकारणातून निवृत्त होणाऱ्या सुरेश दादांच्या नेमक्या भूमिकेविषयी राजकीय वर्तुळात चर्चा सुरू झाली आहे.
माजी आमदार सुरेशदादा जैन यांनी मुंबई येथे जाऊन शिवसेना ठाकरे गटाच्या प्राथमिक सदस्यत्वाचा राजीनामा दिला. त्यानंतर राजकारणातून निवृत्त होत असल्याबाबत सांगितले. तसेच राजकारणात केवळ मार्गदर्शकाची भूमिका राहील असेही सांगितले. मात्र सुरेशदादा जैन यांच्या या निर्णयानंतर आता दादा कुठेच सक्रिय राहणार नाहीत हे निश्चित झाले.
मात्र आता नुकतीच एक खात्रीशीर माहिती समोर येत आहे. सुरेशदादा जैन हे लवकरच जळगाव व रावेर लोकसभा मतदारसंघातील भारतीय जनता पक्षाच्या दोन्ही उमेदवारांना जाहीर पाठिंबा देणार असल्याबाबत प्रसिद्धी पत्रकांन्वये सांगणार असल्याचे समोर येत आहे. ? सुरेशदादा जैन यांच्या या भूमिकेबाबत मात्र राजकीय वर्तुळात चर्चा रंगू लागली आहे. एकीकडे राजकीय जीवनातून निवृत्ती घेत असताना मात्र भारतीय जनता पक्षाच्या उमेदवारांना जाहीर पाठिंबा देण्याबाबत नेमकी सुरेशदादांची भूमिका तरी काय याबाबत चर्चा रंगणार आहे.
दुसरीकडे सुरेशदादा यांचे कट्टर समर्थक आणि शिवसेना ठाकरे गटात प्रमुख पदांवर असलेले माजी महापौर नितीन लढ्ढा, विष्णू भंगाळे, सुनील महाजन यांच्यासह अनेक कार्यकर्ते मात्र गोंधळात पडले आहेत. या कट्टर समर्थकांची नेमकी भूमिका काय राहणार आहे हे देखील भविष्यकाळात पाहण्यासारखे राहणार आहे.
