अन्न व औषध प्रशासनाची बोदवड शहरात धडक कारवाई
जळगाव (प्रतिनिधी) : जिल्हयात सुरु असलेल्या गुटखा विक्री व वाहतुकीविरुदध अन्न व औषध प्रशासन, जळगाव कार्यालयाने मोहीम तीव्र केलेली आहे. या मोहीमेअंतर्गत पथकाने बुधवार दि. ५ जून रोजी सकाळी ११ वाजेच्या सुमारास मुक्ताईनगर रोड, बोदवड शहराजवळ सापळा रचून एका कारमधून ७ लाख २८ हजार रुपयांचा प्रतिबंधित पान मसाला व गुटखा जप्त केला आहे. याबाबत गुन्हा दाखल करण्यात आला आहे.
मुक्ताईनगर रस्त्यावर आर्टिगा कार हे संशयित वाहन क्रमांक ( एम एच सी व्ही ७८८८) या वाहनाला प्रतिबंधीत अन्न पदार्थाची चोरटी वाहतूक होत असल्याच्या संशयावरुन् पथकाने थांबविले. सदर वाहनचालकाकडे चौकशी केली असता अभिषेक ज्ञानेश्वर बारी (रा. जामनेर) असे त्याने नाव सांगितले. त्या वाहनाची थांबवून पाहणी केली असता त्यामध्ये महाराष्ट्र राज्यामध्ये प्रतिबंधीत असलेला पानमसाला व सुगंधीत तंबाखू या अन्न पदार्थाचा साठा आढळून आल्यामुळे बोदवड पोलीस स्टेशन येथे प्रथम खबरी अहवाल दाखल करण्यात आलेला आहे.
त्याच्याकडे पानमसाला व सुगंधीत तंबाखू यांचा वाहनासह एकूण साठा रु. ७,२८,०५०/- जप्त केला आहे. सदर कारवाई ही अन्न सुरक्षा अधिकारी शरद म. पवार, त्यांचे सहकारी अन्न सुरक्षा अधिकारी. के.एच. बाविस्कर, आ.भा. पवार यांनी अन्न व औषध प्रशासन, जळगाव या कार्यालयाचे सहायक आयुक्त संतोष कांबळे व सह आयुक्त, (नाशिक विभाग) सं.भा. नारगुडे यांच्या मार्गदर्शनाखाली केलेली आहे. सदर गुन्हयामधील मुख्य सुत्रधाराचा शोध घेतला जात असून जळगाव जिल्हयात अन्न व औषध प्रशासनाच्या वतीने गुटख्याविरुदध तीव्र कारवाई करणार असल्याची माहिती अधिका-यांनी दिली.
