पुणे ( प्रतिनिधी ) – बारामतीतील सोनगाव येथे पोलीस पथक अवैध दारु विक्रेत्यावर कारवाई करत असताना भितीपोटी मंगलेश भोसले (वय ४५, रा. सोनगाव) याने निरा नदीवरील बंधाऱ्यात उडी मारली. त्याचा बुडून मृत्यू झाल्याच्या घटनेनंतर संतप्त जमावाने पोलिसांवर हल्ला केला. त्यात तीन पोलिस कर्मचारी जखमी झाले.
सोनगाव येथील अवैध दारु धंद्यावर कारवाईसाठी बारामतीच्या उपविभागीय पोलिस अधिकाऱ्यांचे पथक गेले होते. पोलिसांची चाहूल लागताच मंगलेश भोसले याने भितीपोटी पळ काढला. लगतच्या निरा नदीवरील बंधाऱ्यात उडी मारत पलीकडील तीरावर पोहून जात निसटण्याचा प्रयत्न केला. परंतू पोहताना दम लागल्याने बुडून त्याचा मृत्यू झाला.
मंगलेश भोसलेचा मृत्यू झाल्यामुळं संतप्त झालेल्या वस्तीवरील जमावाने पोलिसांवर हल्ला केला. त्यात तीन पोलिस कर्मचारी गंभीर जखमी झाले आहेत. दरम्यान या घटनेमुळे सोनगावातील स्थिती अधिकच चिघळली आहे. पोलिसांनी जादा कुमक मागवत घटनास्थळी ती पाठवली आहे.
बारामतीच्या ग्रामीण भागात सुरु असलेल्या अवैध दारु धंद्यावरून उपमुख्यमंत्री अजित पवारांनी पोलीस अधिकाऱ्याला खडसावले होते. कारवाई करत हे सगळे अवैध दारु धंदे बंद करण्यास सांगितले होते.
