जळगाव शहरातील भास्कर मार्केट परिसरातील घटना
जळगाव (प्रतिनिधी) : भरदुपारी बारमध्ये गणवेशातच बसून तर्रर्र झालेल्या पोलिसांमध्ये जोरदार वाद होऊन आपसात हाणामारी झाली. त्यानंतर कार काढताना काही अंतरावर जाऊन एका सायकलस्वार मुलाला धडक देत पसार झाले. सुदैवाने यात मुलाला मोठी दुखापत झाली नाही. ही घटना रविवारी दिनांक २५ ऑगस्ट रोजी संध्याकाळी घडली.
हे पोलिस जळगावात बंदोबस्तासाठी आल्याची माहिती मिळाली असून ते जिल्ह्यातीलच असल्याची माहिती मिळत आहे.काल रविवारी दुपारी भास्कर मार्केट परिसरातील एका बारमध्ये चार ते पाच पोलिस कर्मचारी आले. ते गणवेशातच होते व वर जॅकेट घातले होते. सुरुवातीला मद्यपान केल्यानंतर ते निघून गेले. मात्र काही वेळाने परत तेथे आले व पुन्हा मद्यपान केले. बारमध्ये बसलेले असतानाच तेथे दोन ग्लास त्यांनी फोडले. त्यानंतर संध्याकाळी साडेपाच ते पावणे सहावाजेदरम्यान बाहेर आल्यानंतर त्यांच्यात आपसात वाद झाले. बराच वेळ त्यांच्यात बाचाबाची सुरू होती.
हा वाद वाढतच जाऊन तिघे जण एकमेकांना भिडले व चांगलीच पकडापकडी झाली. त्यात एक जण तर चिखलातही पडला. तर्रर्र झालेले हे कर्मचारी कारमध्ये (क्र. एमएच ०२, ईएच १०४८) बसले व ती काढत असताना दोन दुचाकींना धक्का दिल्याने त्या खाली पडल्या. विशेष म्हणजे या कारवर पोलिसांचा लोगोदेखील आहे. त्यानंतर कशीबशी कार काढली व रस्त्याला लागल्यानंतर समोर एका सायकलस्वार मुलाला धडक दिली. त्यात तो मुलगा खाली पडला तरीदेखील न थांबता कारचालक भरधाव वेगाने पसार झाला. यात सुदैवाने मुलाला काही दुखापत झाली नाही. हा सर्व प्रकार बारसह आजूबाजूच्या सीसीटीव्ही कॅमेरामध्ये कैद झाला आहे.
या वादाविषयी परिसरातील काही व्यावसायिकांनी जिल्हा पेठ पोलिसांना माहिती दिली. त्या वेळी तेथे कर्मचारी सलीम तडवी व त्यांचे सहकारी पोहचले. त्यांना कारचालक पसार होताना दिसल्याने त्यांनी पाठलाग केला. मात्र तो भरधाव वेगाने निघून गेला. या घटनेचे दिवसभर चर्चा होती आता पोलीस अधीक्षक या घटनेबद्दल काय कारवाई करतात याकडे लक्ष लागून आहे.
