दुसरा फरार आरोपी सापडला दोंडाईचा तालुक्यात : अमळनेर तालुक्यात घडली होती घटना
जळगाव (प्रतिनिधी) : जळगाव एलसीबी पोलिसांच्या तावडीतून बेडयांसह फरार झालेल्या दोन गुन्हेगारांपैकी एकाला दिल्लीतून अटक करण्यात आली होती. त्यानंतर दुसऱ्याला धुळे जिल्ह्यातील दोंडाईचा तालुक्यातून एलसीबीच्या पथकाने अटक केली आहे.
एलसीबीचे पथक काही दिवसांपूर्वी दोन्ही आरोपींना जळगाव येथून अमळनेरकडे घेऊन येत होते. रात्री सुमारे साडेअकरा वाजता कुऱ्हे गावाजवळ सती माता मंदिराच्या अंडरपासमध्ये वाहनाचा वेग कमी होताच, दोघांनी मागच्या सीटवरून उडी मारली. बेड्या लागलेल्या असतानाही त्यांनी अंधाराचा फायदा घेतला आणि रेल्वे रुळ ओलांडून शेतात पसार झाले होते. यामुळे आरोपीना आणणाऱ्या जबाबदार चारही पोलिसांचे निलंबन झाले आहे.
यातील एक आरोपी अमजद फकिरा कुरेशी (रा. मेहरुण, जळगाव) याला दिल्ली येथून अटक करण्यात आली होती. तसेच दुसरा फरार आरोपी शाकीर शाह अरमान शाह (वय २४, रा. सुप्रीम कॉलनी, जळगाव) याला तांत्रिक मुद्यांच्या आधारे पोलिसांनी शोध घेतला असता शाकीर शाह हा राजस्थान येथील अजमेर दर्ग्यावर असल्याचे समजले. मात्र तेथून त्याने पलायन केले. नंतर त्याचे लोकेशन धुळे जिल्ह्यात दोंडाईचा येथे त्याला शिताफिने अटक करण्यात आली. एलसीबी पोलिसांनी त्याला पकडून अमळनेर पोलिसांच्या स्वाधीन केले आहे.
सदर आरोपीला दिल्ली येथून अटक करणेकामी ग्रेड पीएसआय रवी नरवाडे, हवालदार गोपाल गव्हाळे, अक्रम शेख, प्रवीण भालेराव, हरिलाल पाटील, संदीप पाटील, राहुल कोळी, दीपक चौधरी, भरत पाटील यांनी मेहनत घेतली. दरम्यान, अमळनेर पोलीस स्टेशनच्या अधिकाऱ्यांनी त्याला न्यायालयात हजर केले असता त्याला पोलीस कोठडी मिळाली आहे.
