कचरा झाडल्यावर वेळेत उचलण्याच्या महापालिका कर्मचाऱ्यांना सूचना
जळगाव, (प्रतिनिधी) – शहराच्या मध्यवर्ती भागात असलेल्या लेवा बोर्डिंग सभागृहाबाहेर कचऱ्याचा ढीग पाहून महापौर दीपमाला काळे यांनी तीव्र संताप व्यक्त केला. महापौरांच्या आक्रमक पवित्र्यानंतर महापालिकेच्या आरोग्य विभागाने चक्रे फिरवली आणि तब्बल सहा-सात तास पडून असलेला कचरा अवघ्या २० मिनिटांत हटवण्यात आला.
शनिवारी सकाळी स्वच्छता कर्मचाऱ्यांनी लेवा बोर्डिंग परिसरातील साफसफाई केली. मात्र, गोळा केलेला कचरा उचलण्याऐवजी तो सभागृहाच्या मुख्य दरवाजाजवळच ढिगाऱ्याच्या स्वरूपात सोडून कर्मचारी निघून गेले. स्थानिक नागरिकांनी कर्मचाऱ्यांना हा कचरा तत्काळ उचलण्याची विनंती केली होती, मात्र दुपारी १ वाजेपर्यंत त्याकडे पूर्णपणे दुर्लक्ष करण्यात आले.
उद्घाटनाला येताच महापौरांच्या संतापात भर
लेवा बोर्डिंग सभागृहात एका प्रदर्शनाचे उद्घाटन करण्यासाठी महापौर दीपमाला काळे दुपारी १ वाजता पोहोचल्या. सभागृहाच्या प्रवेशद्वारावरच कचऱ्याचे साम्राज्य पाहून त्यांनी नाराजी व्यक्त केली. नागरिकांनी महापौरांना परिस्थितीची कल्पना देताच त्यांनी क्षणाचाही विलंब न लावता आपल्या स्वीय सहाय्यकांना आरोग्य विभागाला कचरा उचलण्याचे आदेश दिले.
आरोग्य विभागाची धावपळ
महापौरांच्या संतापानंतर आरोग्य विभाग खडबडून जागा झाला. अवघ्या अर्ध्या तासात महापालिकेचे कर्मचारी आणि कचरा उचलणारे वाहन घटनास्थळी दाखल झाले आणि तो ढीग साफ करण्यात आला. महापौरांनी दाखवलेल्या या तत्परतेबद्दल परिसरातील नागरिकांनी त्यांचे आभार मानले आहेत. या घटनेनंतर महापौरांनी आरोग्य विभागाला स्पष्ट ताकीद दिली आहे. संपूर्ण जळगाव शहरात साफसफाई वेळेवर झालीच पाहिजे. केवळ कचरा झाडून त्याचे ढीग लावू नयेत. साफसफाई झाल्यानंतर एका तासाच्या आत तो कचरा तिथून उचलला गेलाच पाहिजे. या कारवाईमुळे कामात कुचराई करणाऱ्या कर्मचाऱ्यांचे धाबे दणाणले आहे.
