बेवारस मृतदेहाचे रहस्य उलगडले : रावेर पोलीस स्टेशनला ७ जणांवर गुन्हे दाखल
रावेर (प्रतिनिधी) : सातपुड्याच्या दुर्गम भागातील पिंपरकुड शिवारात सुकी नदीच्या पात्रात आढळलेल्या अज्ञात मृतदेहाची ओळख पटली. मात्र, मृतदेह आपल्या घराजवळ पाहून पूर्ण संशय येऊ नये, म्हणून हा मृतदेह सुकी नदी पात्रानजीक टाकण्यात आला. या प्रकरणी सात जणांविरुद्ध गुन्हा दाखल करण्यात आला आहे.
एरंडोल तालुक्यातील दापोरी येथे हातमजुरी करणारा सुरेश सुमर्या बारेला (वय २५, रा. कलोरी, जि. खंडवा म. प्र.) हा पत्नी चंपीबाई व मुलाबाळांसह
पिंपरकुड पाड्यावर सासुरवाडीत आला होता. तेव्हा त्याने तेथे झाडाला गळफास घेऊन दि. २० मार्च आत्महत्या केली होती. आपल्या घराजवळ आत्महत्या केलेला इसम गावातील जावई असल्याने नाहक आपल्यावर घातपाताचा संशय नको, म्हणून काही जणांनी हा मृतदेह सुकी नदी पात्रातील पालच्या कच्च्या रस्त्याजवळ आणून ठेवला. दरम्यान, या अनोळखी मृतदेहाची दि. २६ रोजी ओळख पटली. मात्र, शवविच्छेदन अहवाल आणि मृतदेहाच्या मानेवरील व्रण पाहता फैजपूर विभाग पोलिस उपअधीक्षक कृष्णांत पिंगळे व पोलीस निरीक्षक डॉ. विशाल जयस्वाल यांनी तपास सुरू केला.
मृतदेह हलविल्याप्रकरणी मयताची पत्नी चंपीबाईने दिलेल्या फिर्यादीवरून रावेर पोलिसात वरील सातही जणांविरुद्ध रावेर पोलिसात गुन्हा दाखल करण्यात आला आहे. गिरसिंग कर्ता बारेला, तेजसिंग करम्या बारेला, सीताराम कजम्या बारेला, संजय रेजला बारेला, रेजला गोटा बारेला, धिचल सीताराम बारेला, बारसिंग नावडा बारेला (सर्व रा.नवीन नवाड, पिंपरकुड) अशी गुन्हा दाखल झालेल्यांची नावे आहेत. या घटनेमुळे खळबळ उडाली आहे.
