जळगाव शहरातील एमआयडीसी परिसरातील घटना
जळगाव ( प्रतिनिधी ) – येथील एमआयडीसी परिसरातील जय आनंद दाल मील कंपनीत राहणाऱ्या एका २२ वर्षीय तरुणाने बुधवारी रात्री ११ वाजण्याच्या सुमारास राहत्या घरात गळफास घेऊन आत्महत्या केल्याची धक्कादायक घटना समोर आली आहे. या आत्महत्येमागचे नेमके कारण अद्याप स्पष्ट झालेले नाही. या प्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
अजय बुधराम पाटील (वय-२२, रा. एमआयडीसी, जळगाव) असे मयत तरुणाचे नाव आहे. मूळचा मध्यप्रदेशातील नेपानगर येथील रहिवासी असलेला अजय पाटील गेल्या तीन वर्षांपासून आपल्या पत्नीसोबत एमआयडीसीतील जय आनंद दाल मील कंपनीच्या खोल्यांमध्ये वास्तव्याला होता.(केसीएन)त्याच कंपनीत काम करून तो आपला उदरनिर्वाह करत होता. बुधवारी रात्री १२ जून रोजी अजयने नेहमीप्रमाणे पत्नीसोबत जेवण केले. त्यानंतर त्याची पत्नी घराबाहेर भांडी धुत असताना, अजयने घरात जाऊन दोरीने गळफास घेऊन जीवन संपवले.
घटनेचे गांभीर्य लक्षात येताच त्याच्या पत्नीने आरडाओरड केली. तिचा आवाज ऐकून शेजारी राहणाऱ्यांनी तात्काळ धाव घेतली. त्यांनी अजयला खाली उतरवून तातडीने जळगाव येथील शासकीय वैद्यकीय महाविद्यालयात दाखल केले.(केसीएन)मात्र, वैद्यकीय अधिकाऱ्यांनी तपासणीअंती त्याला मृत घोषित केले. या घटनेने परिसरात हळहळ व्यक्त होत आहे. अजयने आत्महत्या का केली, याचे कारण अद्याप समोर आलेले नाही. एमआयडीसी पोलीस ठाण्यात या प्रकरणी अकस्मात मृत्यूची नोंद करण्यात आली असून, पोलीस कॉन्स्टेबल मुकुंद पाटील हे पुढील तपास करत आहेत.
