दारुड्यांच्या वादात हत्या झाल्याचा संशय, एक ताब्यात
जळगाव (प्रतिनिधी):- धरणगाव तालुक्यातील पाळधी रेल्वे स्थानकाजवळ सोमवारी पहाटे एका ३५ वर्षीय मजुराचा मृतदेह आढळून आल्याने परिसरात खळबळ उडाली आहे. पिंटू आमशा बारेला (वय ३५, रा. बरेली, जि. बडवानी, मध्यप्रदेश) असे मृत तरुणाचे नाव असून, दारुड्यांच्या वादात मजुराची हत्या करण्यात आल्याचा प्राथमिक अंदाज पोलिसांनी वर्तवला आहे. या प्रकरणीl पोलिसांनी एका संशयिताला ताब्यात घेतले असून अधिक तपास सुरू आहे.
रेल्वे प्रशासनाच्या अधिकाऱ्यांना सोमवार, २३ मार्च रोजी पहाटे दीड वाजेच्या सुमारास पाळधी स्थानकाजवळ एक अनोळखी व्यक्ती पडलेली दिसून आली. त्यांनी तातडीने याची माहिती पाळधी दूरक्षेत्रातील पोलीस कर्मचाऱ्यांना दिली. पोलिसांनी घटनास्थळी धाव घेत मृतदेह ताब्यात घेतला आणि उत्तरीय तपासणीसाठी शासकीय वैद्यकीय महाविद्यालय व रुग्णालयात (जीएमसी) हलवले. मृत पिंटू बारेला याच्या शरीरावर, डोक्यावर आणि हातावर गंभीर जखमांच्या खुणा आढळून आल्या आहेत.
प्राथमिक तपासात दारुड्यांच्या वादात एकाने दुसऱ्याच्या डोक्यात टणक वस्तू मारल्याने त्याचा मृत्यू झाल्याचे दिसून येत आहे. घटनेचे गांभीर्य ओळखून पोलिसांनी तपासाची चक्रे वेगाने फिरवली असून, एका संशयित आरोपीला अटक केली आहे. त्याची सध्या कसून चौकशी सुरू असून हत्येचे नेमके कारण अद्याप स्पष्ट झालेले नाही.
मयत पिंटू हा रेल्वे रुळावर मजुरीचे काम करून आपल्या कुटुंबाचा उदरनिर्वाह करत होता. त्याच्या निधनाने कुटुंबावर दुःखाचा डोंगर कोसळला आहे. या प्रकरणी मयताची पत्नी सखुबाई बारेला यांच्या फिर्यादीवरून पाळधी दूरक्षेत्र पोलीस स्टेशनमध्ये गुन्हा दाखल करण्याचे काम सुरू आहे. पुढील तपास पोलीस प्रशासन करत आहे.
