पहूर / ता.जामनेर (प्रतिनिधी) : तालुक्यातील पहूर कसबे येथे अज्ञात चोरट्यांनी एका बंद घराचे कुलूप तोडून घरात प्रवेश करत १ लाख २० हजार रुपयांची रोकड चोरून नेल्याची घटना उघडकीस आली आहे. याप्रकरणी पहूर पोलीस ठाण्यात अज्ञात चोरट्याविरुद्ध घरफोडीचा गुन्हा दाखल करण्यात आला आहे.
पोलीस सूत्रांकडून मिळालेल्या माहितीनुसार, पहूर कसबे येथील रहिवासी आणि व्यावसायिक शेतकरी कमलेश विकास बनकर (वय २५) यांच्या घरात ही चोरी झाली. १९ जून २०२६ च्या रात्री १०.४५ ते २० जून २०२६ च्या रात्री १२.३५ वाजेच्या दरम्यान बनकर यांच्या घराचे कुलूप आणि कडी-कोयंडा तोडून अज्ञात चोरट्यांनी आत प्रवेश केला. घरात ठेवलेली १,२०,०००/- रुपये (एक लाख वीस हजार रुपये) किमतीची रोकड चोरट्यांनी लंपास केली. या रोकडमध्ये ५०० रुपयांच्या २०० नोटा आणि इतर २००, १०० व ५० रुपयांच्या नोटांचा समावेश होता.
कमलेश बनकर यांनी याप्रकरणी २० जून रोजी पहूर पोलीस ठाण्यात तक्रार दिली. त्यांच्या फिर्यादीवरून अज्ञात चोरट्याविरुद्ध भारतीय न्याय संहिता (BNS) २०२३ चे कलम ३३१(४) आणि ३०५ अन्वे गुन्हा रजिस्टर क्रमांक १६३/२०२६ नुसार दाखल करण्यात आला आहे.
घटनेची माहिती मिळताच पाचोरा भागाचे उपविभागीय पोलीस अधिकारी बापू रोहोम यांनी घटनास्थळी भेट देऊन पाहणी केली. या प्रकरणाचा पुढील तपास पहूर पोलीस ठाण्याचे पोलीस उपनिरीक्षक भरत दाते करत आहेत.
