जळगाव (प्रतिनिधी) : नशिराबाद पोलीस ठाण्याच्या हद्दीत महामार्गावरील उड्डाण पुलाजवळ भरधाव दुचाकीने दिलेल्या धडकेत दोन युवक जखमी झाल्याची घटना घडली आहे. याप्रकरणी अज्ञात दुचाकी चालकाविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, १४ जून २०२६ रोजी दुपारी सुमारे ४.४० वाजेच्या सुमारास नशिराबाद येथील महामार्गावरील उड्डाण पुलावर ही घटना घडली. फिर्यादी आदिल फिरोज खान (वय २०, रा. लक्ष्मीनगर, जळगाव) हे त्यांच्या मित्रासोबत दुचाकी क्रमांक एमएच-१९ बीटी-८९३८ वरून साकेगावकडे जात होते.
यावेळी एमएच-३५ एझेड-९०४० क्रमांकाच्या दुचाकीवरील अज्ञात चालकाने भरधाव वेगाने आणि निष्काळजीपणे वाहन चालवत फिर्यादीच्या दुचाकीला मागून जोरदार धडक दिली. या अपघातात आदिल खान व त्यांचा मित्र जखमी झाले.
या प्रकरणी आदिल खान यांच्या फिर्यादीवरून नशिराबाद पोलीस ठाण्यात गुन्हा क्रमांक १९१/२०२६ दाखल करण्यात आला आहे. भारतीय न्याय संहिता कलम २८१, १२५(अ), १२५(ब) तसेच मोटार वाहन कायदा कलम १८४ अन्वये अज्ञात चालकाविरुद्ध गुन्हा नोंदविण्यात आला आहे.
या घटनेचा पुढील तपास पोलीस हवालदार प्रशांत विरनारे करीत आहेत. अद्याप आरोपी चालकाचा शोध सुरू असून कोणालाही अटक करण्यात आलेली नाही.
