पिंपळगाव हरेश्वरमध्ये हत्येचा खळबळजनक उलगडा
पाचोरा (प्रतिनिधी):- तालुक्यातील वरसाडे तांडा येथे एका २६ वर्षीय तरुणाची निर्घृण हत्या करून पुरावा नष्ट करण्यासाठी प्रेताची विल्हेवाट लावल्याची धक्कादायक घटना उघडकीस आली आहे. याप्रकरणी पिंपळगाव हरेश्वर पोलिसांनी पती-पत्नीला अटक केली आहे.
विजय भिमा राठोड (वय २६, रा. वरसाडे तांडा) हा तरुण २४ फेब्रुवारी २०२६ पासून बेपत्ता होता. १३ मार्च २०२६ रोजी या प्रकरणाचा तपास लागला असता, विजयची हत्या झाल्याचे समोर आले. विजयने आरोपी महिला सोनाली संजय जाधव हिच्यासोबतचे काही अश्लील व्हिडिओ मोबाईलमध्ये बनवले होते. याच गोष्टीचा राग मनात धरून हा कट रचण्यात आला. या गुन्ह्यात पोलिसांनी संजय परशुराम जाधव व सोनाली संजय जाधव (दोघे रा. वरसाडे तांडा नं. ०३, पाचोरा) या आरोपींना अटक केली आहे.
दोन्ही आरोपींनी संगनमत करून विजय राठोड याचा घातपात केला आणि पुरावा नष्ट करण्याच्या उद्देशाने त्याच्या मृतदेहाची विल्हेवाट लावली. याप्रकरणी मयताचा भाऊ संजय भिमा राठोड (वय २५) यांनी दिलेल्या फिर्यादीवरून पिंपळगाव हरेश्वर पोलीस स्टेशनमध्ये गुन्हा दाखल करण्यात आला आहे.
तपास सपोनि कल्याणी वर्मा करीत आहेत. उपविभागीय पोलीस अधिकारी बापू रोहोम यांनी घटनास्थळी भेट देऊन तपासाच्या सूचना दिल्या आहेत. या घटनेमुळे परिसरात मोठी खळबळ उडाली असून पोलीस पुढील तपास करत आहेत.
