पाचोऱ्यात सव्वा चार लाखांचा मुद्देमाल चोरटयांनी पळविला
पाचोरा (प्रतिनिधी) – शहरातील मोंढाळा रोडवरील बाजोरिया ऑईल रिफायनरीत तीन अनोळखी चोरट्यांनी प्रवेश करत सुरक्षा रक्षकास चाकुचा धाक दाखविला. कार्यालयातून ४ लाख ५ हजार रुपये रोख व १३ हजार रुपयांचा मुद्देमाल चोरुन नेल्याची घटना २३ जुलै रोजी पहाटे ४ वाजेच्या सुमारास उघडकीस आली आहे. घटनेची माहिती मिळताच पाचोरा पोलिसांनी घटनास्थळी धाव घेतली. पाचोरा पोलिस ठाण्यात तीन अनोळखी चोरट्यांविरुद्ध चोरीचा गुन्हा नोंदविण्यात आला आहे.
शहरातील मोंढाळे रोडवर आशिष बाजोरिया यांची बाजोरिया ऑईल रिफायनरी आहे. आशिष बाजोरिया यांनी पाचोरा पोलिस स्टेशनमध्ये दिलेल्या फिर्यादीनुसार आशिष बाजोरिया हे २२ जुलै रोजी आपले रिफायनरी व कृषक धान्य व्यवसायातून जमा झालेले ४ लाख रुपये कपाटीतील तिजोरीत ठेवुन दुपारी ४ वाजता खाजगी कामानिमित्त घरी गेले. दरम्यान घरी उशिर झाल्याने आशिष बाजोरिया हे सायंकाळी फॅक्टरीत न जाता घरीच थांबले. दरम्यान २३ जुलै रोजी पहाटे ४:१५ वाजता आशिष बाजोरिया यांना सुरक्षा रक्षक याने दुसऱ्या व्यक्तीच्या मोबाईल वरुन फोन केला असता, आलेला तो नंबर नविन असल्याने आशिष बाजोरिया यांनी उचलला नाही. मात्र थोड्यावेळाने ४:१५ वाजता शेजारील व्यक्तीचा फोन आला. यावेळी मात्र आशिष बाजोरिया यांनी फोन उचलला. त्यावेळी त्यांना चोरी कळले.
आशिष बाजोरिया यांनी घटनास्थळ गाठले. तात्काळ पाचोरा पोलिसांना पाचारण केले. घटनास्थळी दाखल होऊन घटनास्थळाचा पंचनामा केला. आशिष बाजोरिया व सुरक्षा रक्षक प्रकाश पाटील यांच्या माहितीनुसार तीन अनोळखी चोरटयांनी तारेच्या जाळीवरुन आत आले. सुरक्षा रक्षक प्रकाश पाटील यांच्या लक्षात येताच त्यांनी चोरट्यांना अडविण्याचा प्रयत्न केला मात्र, चोरट्यांनी त्यांच्या जवळ असलेल्या चाकूचा धाक दाखवून प्रकाश पाटील यांचे हात-पाय बांधुन त्यांना एका ठिकाणी बसण्याची धमकी दिली. गोदरेज कपाटाचा लाॅक तोडुन कपाटातील तिजोरीतील ४ लाख ५ हजार रुपये रोख, ६ हजार रुपये किंमतीचा सी. सी. टी. व्ही. चा डी. व्ही. आर, १ हजार रुपये किंमतीचे सोनेरी पेपर वेट, पैसे ठेवलेली ५ हजार रुपये किंमतीची तिजोरी व सुरक्षा रक्षक प्रकाश पाटील यांचा १ हजार रुपये किंमतीचा मोबाईल असा ४ लाख १८ हजार रुपयांचा मुद्देमाल घेऊन घटनास्थळावरुन पसार झाले.
घटने प्रकरणी आशिष बाजोरिया यांच्या फिर्यादीवरून पाचोरा पोलिस स्टेशनमध्ये तीन अनोळखी चोरट्यांविरुद्ध गुन्हा नोंदविला आला. या घटनेचा पुढील तपास पोलिस निरीक्षक राहुल खताळ यांच्या मार्गदर्शनाखाली पोलिस उपनिरीक्षक योगेश गणगे हे करीत आहे.
