आरोपीला ताब्यात देण्याच्या मागणीवरून जमाव आक्रमक; पांगवण्यासाठी अश्रूधुराच्या नळकांड्या अन् सौम्य लाठीमार
जळगाव (प्रतिनिधी) – बोदवड तालुक्यातील जामठी येथे एका खासगी क्लासच्या शिक्षकाने अल्पवयीन मुलीशी अश्लील वर्तन करून अयोग्य मागणी केल्याचा संतापजनक प्रकार समोर आला आहे. या घटनेमुळे संतप्त झालेल्या जमावाने संशयित शिक्षकाची कार पेटवून दिली, तर त्याला जमावाच्या ताब्यात देण्याच्या मागणीवरून पोलिसांवरही दगडफेक केली. परिस्थिती चिघळल्याने पोलिसांनी अश्रूधुराच्या नळकांड्या फोडत सौम्य लाठीमार करून परिस्थिती नियंत्रणात आणली.
जामठी येथील खासगी क्लासच्या शिक्षकाने अल्पवयीन विद्यार्थिनीशी गैरवर्तन केल्याचे उघडकीस आल्यानंतर परिसरात तीव्र संतापाची लाट पसरली. या प्रकरणी बोदवड पोलीस ठाण्यात ‘पॉक्सो’ कायद्यांतर्गत गुन्हा दाखल करण्याची प्रक्रिया सुरू असतानाच शेकडो नागरिकांचा जमाव संशयित शिक्षकाच्या घरावर चालून गेला. घटनेचे गांभीर्य ओळखून पोलिसांचे पथक तत्काळ घटनास्थळी दाखल झाले आणि त्यांनी संशयित शिक्षकाला ताब्यात घेतले.
दरम्यान, पोलिसांनी संशयिताला ताब्यात घेतल्यानंतरही जमावाचा रोष शांत झाला नाही. जमावाने शिक्षकाची घरासमोर उभी असलेली कार पेटवून दिली. तसेच आरोपी शिक्षकाला पोलिसांच्या वाहनातून खाली उतरवून थेट जमावाच्या स्वाधीन करण्याची मागणी करत पोलिसांना घेराव घातला. यावरून पोलीस आणि नागरिकांमध्ये मोठी झटापट झाली. पोलिसांनी संशयिताला सुरक्षित बाहेर काढण्याचा प्रयत्न केला असता, संतप्त जमावाकडून पोलिसांच्या दिशेने दगडफेक सुरू करण्यात आली.
दगडफेक वाढल्याने आणि कायदा-सुव्यवस्थेचा प्रश्न निर्माण झाल्याने पोलिसांनी परिस्थितीवर नियंत्रण मिळवण्यासाठी अश्रूधुराच्या नळकांड्या फोडल्या. त्यानंतरही जमाव पांगण्यास तयार नसल्याने अखेर सौम्य लाठीमार करण्यात आला. पोलिसांच्या या कारवाईनंतर जमाव हळूहळू पांगला.
घटनेची माहिती मिळताच जिल्हा पोलीस अधीक्षक श्रीकांत धिवरे यांच्यासह मोठा पोलीस बंदोबस्त जामठी गावात दाखल झाला. वरिष्ठ अधिकाऱ्यांच्या उपस्थितीनंतर परिसरातील तणाव निवळला असून सध्या गावात शांतता आहे. या प्रकरणी संशयित शिक्षकाविरुद्ध गुन्हा दाखल करून पुढील कायदेशीर तपास बोदवड पोलीस करत आहेत.
