जळगाव ( प्रतिनिधी ) – साहित्यिक व जिल्हा पोलिस दलातील पो. ना. विनोद अहिरे याना सप्तरंग मराठी चॅनलतर्फे ‘जळगाव गौरव २०२१’ पुरस्कार देऊन नुकतेच सन्मानित करण्यात आले.
सप्तरंग मराठी चैनलतर्फे हॉटेल प्रेसिडेंट कॉटेजमध्ये सप्तरंगचे संचालक पंकज कासार यांच्या मार्गदर्शनाखाली पुरस्कार सोहळ्याचे आयोजन करण्यात आले होते. वैद्यकीय क्षेत्र, पत्रकारिता, विधि ,शेती , पोलीस दल, साहित्य , सामाजिक क्षेत्रातील उल्लेखनीय कामगिरी करणार्या मान्यवरांचा जळगाव गौरव २०२१ पुरस्कार देऊन सन्मान करण्यात आला. डॉ राहुल महाजन, कॅन्सरतज्ञ निलेश चांडक यांच्यासह मान्यवरांना गौरविण्यात आले. साहित्यिक व पोलीस नाईक विनोद अहिरे यांचा कुटुंबासह सिनेअभिनेते शशांक केतकर यांच्या हस्ते पुरस्कार देऊन सन्मान करण्यात आला. या प्रसंगी खासदार रक्षा खडसे, माजी आमदार गुरुमुख जगवाणी आदी मान्यवर उपस्थित होते.
कोरोनाच्या पहिल्या लाटेमध्ये जगभरामध्ये प्रचंड भीती होती. समाज प्रचंड भयभीत होता त्याला पोलिसही अपवाद नव्हते दरम्यान अहिरे यांनी जळगाव कोरोना कक्षात सलग सात महिने गार्ड ड्युटीचे कर्तव्य निर्भयपणे पार पाडले दरम्यान त्यांच्यासह त्यांचे संपूर्ण कुटुंब कोरोनाने बाधीत झाले होते. याच वेदनेतून त्यांनी “मृत्यू घराचा पहारा” या नावाने कोरोना योद्धांच्या वेदनेचं देशातील पहिले पुस्तक लिहिले.एक महिन्याचे संपूर्ण वेतन मुख्यमंत्री कोविड सहायता निधीमध्ये देऊन आदर्श निर्माण केला विविध दीडशे विषयांवर त्यांनी लेख लिहिलेले आहेत. कराटे, स्केटिंग, जलतरण, आइस हॉकी या खेळांचे अहिरे राष्ट्रीय खेळाडू असून त्यानी अनेक पारितोषिके पटकावली आहेत. अहिरे यांनी त्यांच्या “हुकार वेदनेचा” या काव्यसंग्रहातील “खाकीच्या धाग्यांनी विणली नवी कहाणी” ही कविता सादर करून उपस्थितांना मंत्रमुग्ध केले. त्यांचे पोलिस अधीक्षक प्रवीण मुंडे, अपर पोलिस अधीक्षक चंद्रकांत गवळी यांनी कौतुक केले आहे.
