बोदवडमध्ये आरोपीला अटक
बोदवड (प्रतिनिधी): बोदवड तालुक्यातील एका गावात एका २४ वर्षीय महिलेचा विनयभंग करून तिच्या गळ्यातील सोन्याची पोत हिसकावून नेल्याची धक्कादायक घटना घडली आहे. याप्रकरणी बोदवड पोलिसांनी तातडीने कारवाई करत आरोपीला बेड्या ठोकल्या आहेत.
फिर्यादी या २२ फेब्रुवारी रोजी रात्री आपल्या घरी झोपलेल्या होत्या. रात्री साधारण १ वाजेच्या सुमारास संशयित आरोपी नितीन पुंडलिक तायडे (रा. एणगाव, ता. बोदवड) याने फिर्यादीच्या घरात प्रवेश केला. आरोपीने झोपेत असलेल्या फिर्यादीचा विनयभंग करून अश्लील कृत्य केले. इतकेच नव्हे तर, चोरीच्या उद्देशाने त्याने फिर्यादीच्या गळ्यातील २१ हजार रुपये किमतीची सोन्याची पोत तोडून पळ काढला.
या घटनेनंतर फिर्यादीने दिलेल्या तक्रारीवरून बोदवड पोलीस स्टेशनमध्ये गुन्हा दाखल करण्यात आला आहे. पोलीस हेड कॉन्स्टेबल युनूस तडवी करीत आहेत. पोलिसांनी वेगाने चक्र फिरवत आरोपी नितीन तायडे याला २२ फेब्रुवारी रोजीच रात्री ८:३३ वाजता अटक केली आहे. ही कारवाई सपोनि दीपक सुरवाडकर आणि पोउपनि गजानन राहटे यांच्या मार्गदर्शनाखाली करण्यात आली. सध्या पोलीस या प्रकरणाचा पुढील तपास करत आहेत.
