मेहरूणमध्ये नवरदेवासह तिघांवर गुन्हा दाखल
जळगाव (प्रतिनिधी): शहरात रामनगर, मेहरुण भागात हळदीच्या कार्यक्रमात वेळेचे बंधन पाळून बँड बंद केल्याचा राग मनात धरून, नवरदेव आणि त्याच्या साथीदारांनी बँड मालकावर धारदार शस्त्राने हल्ला केल्याची धक्कादायक घटना समोर आली आहे. याप्रकरणी एम.आय.डी.सी. पोलीस ठाण्यात गुन्हा दाखल करण्यात आला आहे.
शिरसोली प्र.बो. येथील रहिवासी आणि बँड मालक अमोल लक्ष्मीकांत पवार (वय २६) हे दि. २१ फेब्रुवारी २०२६ रोजी रात्री १० वाजेच्या सुमारास मेहरुणमधील रामनगर भागात एका हळदीच्या कार्यक्रमात आपला बँड वाजवत होते. रात्री १० वाजले असल्याने नियमानुसार अमोल पवार यांनी बँड वाजवणे बंद केले. मात्र, ‘आम्हाला अजून नाचायचे आहे, तू बँड का बंद केला?’ असे म्हणत नवरदेव शंकर अशोक काळे आणि त्याच्यासोबत असलेल्या २ ते ३ तरुणांनी अमोल यांच्याशी वाद घालण्यास सुरुवात केली.
वादाचे रूपांतर शिवीगाळ आणि मारहाणीत झाले. यादरम्यान, संशयित आरोपींपैकी एकाने अमोल यांच्या डोक्यात धारदार वस्तूने प्रहार करून त्यांना गंभीर जखमी केले. “जर तू बँड पुन्हा सुरू केला नाही, तर तुला सोडणार नाही,” अशी जीवे मारण्याची धमकीही यावेळी देण्यात आली.
या घटनेनंतर जखमी अमोल पवार यांनी दिलेल्या फिर्यादीवरून जळगाव एम.आय.डी.सी. पोलीस ठाण्यात नवरदेव शंकर अशोक काळे व इतर साथीदारांविरुद्ध गुन्हा दाखल करण्यात आला आहे. पोलीस नाईक पंकज पाटील या प्रकरणाचा पुढील तपास करत आहेत.
