जळगाव (प्रतिनिधी) – शहरातील गेंदालाल मिल परिसरातील किराणा दुकान अज्ञात चोरट्यांनी फोडून दुकानातील 25 हजारांचा किराणा माल चोरून नेल्याचा प्रकार आज सकाळी 6.30 वाजेच्या सुमारास उघडकीस आला. शहर पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे.
संदिप गोरख ठाकरे (वय-28, रा. गौतम अपार्टमेंट, गुजराल पेट्रोल पंप, जळगाव) यांचे गेंदालाल मिल, मनपा कॉम्प्लेक्स येथे संदिप ट्रेडींग नावाचे किराणा दुकान आहे. 27 मार्च रोजी रात्री 9 वाजेच्या सुमारास त्यांनी दुकान बंद केले. आज सकाळी 6.30 वाजेच्या सुमारास दुकानाच्या मागे राहणारे मित्र विनोद सावळे यांनी फोन करून सांगितले की, तुझ्या दुकानाचे शटर एका बाजून उचकवलेले दिसून आले . दुकानावर जावून बघितले तर अज्ञात चोरट्याने दुकानाचे शटर डाव्या बाजूने वाकवुन 25 हजाराचा माल चोरून नेला आहे. चहापत्ती, साखर, तेल, साबण, खोबरेल तेल, तेलाच्या बाटल्या, मिरचीच्या पुड्या, शेंगदाणे, कोलगेट, गव्हाचे पिठ आदी चोरून नेल्याचे समोर आले. संदीप ठाकरे यांच्या फिर्यादीवरून शहर पोलीसात अज्ञात चोरट्यांविरोधात गुन्हा दाखल करण्यात आला आहे.