लाहोर (वृत्तसंस्था) – कोरोना व्हायरस जगभरात थैमान घालत आहे त्यातच या व्हायरसला रोखण्यासाठी अनेक देशांनी लॉकडाउन जाहीर केले आहे. तर तिकडे या कोरोनाने पाकिस्तानाही एन्ट्री केली आहे. त्याच पार्श्वभूमीवर देशात लॉकडाउन करण्याची मागणी इथल्या जनतेकडून होत आहे. मात्र पंतप्रधान इम्रान खान यांनी हे शक्य नसल्याचे स्पष्ट केले आहे. देशातील एक तृतीयांश जनता दारिद्र्य रेषेखाली जगत असून मजुरी करून आपले पोट भरत असल्याचे इम्रान खान यांनी म्हटले आहे.
‘पूर्ण लॉकडाउन करणे म्हणजे कर्फ्यू लागू करणे. लोकांना जबरदस्ती घऱाच्या आत राहण्यास भाग पाडणे. आमच्या देशातील २५ टक्के जनता ही दारिद्र्य रेषेखाली जगत असून रोजंदारीच्या कमाईवर आपले पोट भरते. आम्ही आमची स्थिती लक्षात घेता योग्य ती पाऊले उचलत आहोत,’ असेही इम्रान खान यांनी स्पष्ट केले आहे. ‘आम्ही आमच्यासाठी आणि ज्येष्ठ नागरिकांसाठी जबाबदारीने वागण्याची गरज आहे. सोशल डिस्टन्सिंग, अलगीकरण आणि विलगीकरण यांचा सराव करत आपली आणि इतरांची सुरक्षा करणेही गरजेचे आहे,’ असे इम्रान खान यांनी म्हटले आहे. इम्रान खान यांनी यावेळी कोणतीही भीती पसरवू नका असे आवाहन केले आहे. ‘घाबरण्याची गरज नाही अन्यथा गोंधळ निर्माण होऊ शकतो. लोक धावपळ सुरु करतील आणि धान्याचा तुटवडा निर्माण होऊ शकतो. याचे परिणाम खूप भयंकर असती. या संकटातून आपल्या लोकांना बाहेर काढण्यासाठी आम्ही सर्वतोपरी प्रयत्न करत आहोत,’ अशी माहिती इम्रान खान यांनी दिली आहे. शनिवारी सिंध प्रांतात ४१ नवी प्रकरणे समोर आली. यामुळे तेथील कोरोनाग्रस्तांचा आकडा ३३३ वर पोहोचला. तर एकूण पाकिस्तानात करोनाची लागण झालेल्यांची संख्या ६८६ वर पोहोचली आहे.
