नांदेड (वृत्तसंस्था) – स्वामी रामानंद तीर्थ मराठवाडा विद्यापीठातील इंक्युबेशन केंद्रामध्ये ‘कोरोना संसर्ग तपासणी प्रयोगशाळा’ तयार झाली आहे. लवकरच प्रयोगशाळेला आवश्यक त्या मान्यता केंद्र सरकारच्या राष्ट्रीय वैद्यकीय संशोधन परिषदेकडून (आयसीएमआर) प्राप्त होणार आहेत. त्यानंतर कोरोना संसर्गजन्य द्रवाचे नमुने तपासणी सुरू करण्यात येणार आहे.या प्रयोगशाळेमध्ये एकाचवेळी दोन तासात 384 नमुने तपासण्याची सुविधा उपलब्ध होणार आहे. यामुळे महाराष्ट्रामध्ये अशा प्रकारची प्रयोगशाळा निर्मिती करणारे स्वामी रामानंद तीर्थ मराठवाडा विद्यापीठ हे पहिले ठरणार आहे. कोरोना संशयित रुग्णांच्या वैद्यकीय चाचण्या करण्यासाठी यापूर्वी औरंगाबाद येथे नवीन लॅब सुरू करण्यात आली असली तरी किटची उपलब्धता, संशयित रुग्णांची मराठवाड्यात वाढलेली संख्या तसेच आठ जिल्ह्यांचा भार यामुळे या ठिकाणी चाचणी होण्यासाठी विलंब लागत आहे. त्यामुळे आगामी काळात मराठवाडा, विदर्भ, व तेलंगणा येथील रुग्णांचे तपासणी अहवालासाठी या प्रयोगशाळेचा उपयोग होणार आहे. कोरोना संशयित रुग्णांच्या स्वॅबची तपासणी करण्याचे काम मध्यवर्ती ठिकाण म्हणून पूर्वीपासून पुण्याच्या राष्ट्रीय विषाणू संशोधन शाळेत सुरू आहे. यापुर्वी कोरोनाची तपासणी करण्यासाठी राज्यात केवळ चारच प्रयोगशाळा होत्या, कोरोना तपासणीसाठी लागणारी यंत्रणा मुबलक प्रमाणावर उपलब्ध करण्यासाठी शासनाने काही नवीन प्रयोगशाळांना मंजूरी देऊन ती संख्या 16 पर्यंत वाढवली त्यात औरंगाबादच्याही प्रयोगशाळेचाही समावेश आहे.
मात्र राज्याचे सार्वजनिक बांधकाममंत्री तथा नांदेडचे पालकमंत्री अशोकराव चव्हाण, विद्यापीठाचे कुलगुरू डॉ.उद्धव भोसले आणि जिल्हाधिकारी डॉ.विपिन इटनकर यांच्या पुढाकारातून ‘कोरोना संसर्ग तपासणी प्रयोगशाळा’निर्माण होत आहे. नांदेड मधील विद्यापीठाच्या इंक्युबेशन केंद्रामध्ये अत्याधुनिक उपकरणे असलेली सुसज्य प्रयोगशाळा असल्यामुळे विद्यापीठाचे कुलगुरू डॉ.उद्धव भोसले यांनी पालकमंत्री ना.अशोकरावजी चव्हाण आणि जिल्हाधिकारी डॉ.विपिन इटनकर यांच्याशी चर्चा करून ‘कोरोना संसर्ग तपासणी प्रयोगशाळा’ सुरु करण्याकरिता केंद्र सरकारच्या मान्यतेसाठीचा प्रस्ताव जिल्हाधिकारी यांच्या मार्फत राष्ट्रीय वैद्यकीय संशोधन परिषदेकडे (आयसीएमआर) सादर केला होता. लवकरच या बाबतची मान्यता मिळणार आहे.
विद्यापीठाच्या इंक्युबेशन केंद्रासाठी यापूर्वीच ‘रुसा’ कडून ५ कोटी एवढा निधी मिळाला होता. त्यामुळे अत्याधुनिक अशा उपकरणाची उपलब्धता आहे.याशिवाय प्रयोगशाळेसाठी अजून आवश्यक असलेले उपकरणे व सुविधा निर्माण करण्यासाठी महाराष्ट्र शासनाने ५२ लाख रुपये मंजूर केले आहेत. प्रयोगशाळेसाठी लागणारे अत्याधुनिक उपकरण रियल टाईम पीसीआर उपलब्ध आहे. त्याद्वारे एकाचवेळी दोन तासात ३८४ कोरोना संसर्गाचे स्वॅबचे नमुने तपासता येणार आहेत. प्रयोगशाळेतील नमुने परीक्षणाचे काम इंक्युबेशन केंद्राचे समन्वयक डॉ.जी.बी.झोरे यांच्या मार्गदर्शनाखाली होणार आहे. इतरही लागणारे उपकरणे विद्यापीठातील जैवतंत्रशास्त्र संकुलातील वापरण्यात येणार आहेत. यासाठी लागणारे कुशल व अनुभवी मनुष्यबळ इंक्युबेशन केंद्रामध्ये काम करीत असलेल्या ‘स्टार्ट अप’मधील व्यक्तींची निवड केल्या जाणार आहे. शिवाय बाहेरील प्रशिक्षित मनुष्यबळाची नेमणूक करण्यात येणार आहे. कोरोना हा आजार संसर्गजन्य असल्यामुळे सुरक्षितेच्या दृष्टीकोनातून या प्रयोगशाळेचा १०० मी अंतरापर्यंत कुणीही येणार नाही यासाठीची पूर्ण उपाययोजना करण्यात येणार आहे. इथे फक्त पूर्ण सुरक्षित कपड्यामध्ये प्रशिक्षित कर्मचार्यांनाच प्रवेश दिल्या जाणार आहे. या प्रयोगशाळेमुळे मराठवाडयातील आणि आजूबाजूच्या राज्यातील जिल्ह्यांना मोठा फायदा होणार आहे. कोरोना संशयितांच्या घशातील द्रवाची (स्वॅब) तपासणी लवकरात लवकर होईल. आणि कोरोणाचा संसर्ग झालेल्या रुग्णांवर तात्काळ औषोधोपचार करता येणार आहे.
