भुसावळ तालुक्यातील साकेगाव बसस्थानकावरील घटना
जळगाव (प्रतिनिधी) :- भुसावळ तालुक्यातील साकेगाव येथील रहिवासी २ तरुण मंगळवारी दि. २९ रोजी रात्री ८ वाजेच्या सुमारास रुग्णालयात जाण्यासाठी बस स्थानकावर थांबले असता तेथे भुसावळ येथील काही तरुणांनी येऊन जुन्या वादातून दोन तरुणांवर धारदार शस्त्राने प्राणघातक हल्ला केला आहे. यात तरुण गंभीर जखमी झाले असून भुसावळ तालुका पोलीस स्टेशन गुन्हेगारांच्या मागावर लागली आहे.
राहुल संतोष कोळी (वय २४) आणि कुणाल बाळू वाघ (वय २३, दोन्ही रा. साकेगाव ता. भुसावळ) हे दोन्ही साकेगाव येथे एकाच गल्लीत राहतात. दोघेही हात मजुरी करून परिवाराचा उदरनिर्वाह करतात. राहुल कोळीचा परिवार शेती करून परिवाराचा उदरनिर्वाह करतो. दरम्यान मंगळवारी रात्री ८ वाजेच्या सुमारास राहुल आणि कुणाल दोघे गोदावरी फाउंडेशनच्या डॉ. उल्हास पाटील रुग्णालयात जाण्यासाठी साकेगावच्या बस स्थानकावर आले होते. त्यावेळेला भुसावळ येथील काही संशयित तरुण त्या ठिकाणी आले. त्यांनी जुन्या वादातून राहुल व कुणाल यांच्याशी वाद घातला.
वादाचे पर्यावसन हाणामारीत होऊन राहुलवर एकाने मानेवर तर कुणाललादेखील अंगावर प्राणघातक हत्याराने संशयित आरोपींनी वार केला आहे. घटनेमध्ये राहुल आणि कुणाल गंभीर जखमी झाले असून त्यांना डॉ. उल्हास पाटील रुग्णालयात दाखल करण्यात आले आहे. त्यांची प्रकृती चिंताजनक असून वैद्यकीय पथक त्यांच्या प्रकृतीवर लक्ष ठेवून आहे.
दरम्यान, माहिती मिळताच भुसावळ तालुका पोलीस स्टेशनच्या कर्मचाऱ्यांनी घटनास्थळी धाव घेतली. सदर हल्लेखोर यांची ओळख पटवण्याचे काम सुरू असून पोलीस त्यांच्या मागावर लागली आहे. यात एकाची प्रकृती चिंताजनक आहे. रात्री उशिरापर्यंत गुन्हा दाखल करण्याचे काम सुरू होते. दरम्यान भुसावळ तालुक्यात पुन्हा गुन्हेगारीने डोके वर काढल्याने चिंता निर्माण झाली आहे.
