चांदीचे देव, गॅस शेगडी व पितळी भांडी चोरी; एमआयडीसी पोलिस ठाण्यात गुन्हा दाखल
जळगाव, ( प्रतिनिधी ) : शहरातील नेहरू नगर परिसरात बंद घराचे कुलूप तोडून अज्ञात चोरट्यांनी २३ हजार रुपयांचा ऐवज लंपास केल्याची घटना उघडकीस आली आहे. याप्रकरणी एमआयडीसी पोलिस ठाण्यात अज्ञात चोरट्याविरुद्ध घरफोडीचा गुन्हा दाखल करण्यात आला असून पोलिसांनी तपास सुरू केला आहे.
पोलिसांनी दिलेल्या माहितीनुसार, गोविंद रामदास पाटील (वय ५७, रा. नेहरू नगर, जळगाव) यांच्या राहत्या घरात ८ जून रोजी सकाळी ९.३० ते १० जून रोजी दुपारी ४ वाजेदरम्यान अज्ञात चोरट्यांनी घरफोडी केली. चोरट्यांनी घरातील सुमारे १५ हजार रुपये किमतीचे ६ चांदीचे देव (सुमारे ६० ग्रॅम वजन), ३ हजार रुपये किमतीची एचपी कंपनीची गॅस शेगडी तसेच ५ हजार रुपये किमतीची पितळी व तांब्याची भांडी असा एकूण २३ हजार रुपयांचा ऐवज चोरून नेला.
घटनेची माहिती मिळाल्यानंतर गोविंद पाटील यांनी एमआयडीसी पोलिस ठाण्यात तक्रार दाखल केली. त्यांच्या फिर्यादीवरून भारतीय न्याय संहितेच्या कलम ३०५(अ), ३३१(३) व ३३१(४) अन्वये अज्ञात चोरट्याविरुद्ध गुन्हा नोंद करण्यात आला आहे.
या प्रकरणाचा पुढील तपास एमआयडीसी पोलिस ठाण्याचे पोलिस कर्मचारी किरण चौधरी करीत असून, चोरट्यांचा शोध घेण्यासाठी पोलिसांकडून तपासाची चक्रे फिरविण्यात आली आहेत.
