पोल्ट्री व चिकन मार्केटचे विशेष सर्वेक्षण; प्रतिबंधात्मक उपाययोजना युद्धपातळीवर
जळगाव ( प्रतिनिधी ) – नवापूर परिसरातील पोल्ट्री उद्योगामध्ये बर्ड फ्लू संसर्ग वाढत असल्याच्या पार्श्वभूमीवर जळगाव महानगरपालिका प्रशासन अलर्ट मोडवर आले आहे. शहरात बर्ड फ्लूचा कोणताही प्रादुर्भाव होऊ नये आणि नागरिकांच्या आरोग्याचे संरक्षण व्हावे यासाठी मनपाकडून तातडीच्या उपाययोजना सुरू करण्यात आल्या आहेत.
यासंदर्भात उपमहापौर मनोज चौधरी यांनी महानगरपालिकेच्या आरोग्य विभागाची तातडीची आढावा बैठक घेत संबंधित अधिकाऱ्यांना विविध सूचना दिल्या. शहरातील पोल्ट्री फार्म, चिकन दुकाने आणि मांस विक्री केंद्रांचे विशेष सर्वेक्षण करण्याचे आदेश यावेळी देण्यात आले.
बैठकीत शहरातील सर्व चिकन दुकाने, पोल्ट्री फार्म आणि कत्तलखान्यांची तपासणी करण्याचा निर्णय घेण्यात आला. आजारी अथवा मृत कोंबड्यांची तात्काळ नोंद घेऊन संशयित पक्ष्यांचे नमुने प्रयोगशाळेत तपासणीसाठी पाठविण्यात येणार आहेत. तसेच नवापूर किंवा बाधित भागातून येणाऱ्या पोल्ट्री वाहनांवर विशेष लक्ष ठेवण्याच्या सूचना देण्यात आल्या आहेत. आवश्यक असल्यास शहरातील प्रवेश बिंदूंवर तपासणी मोहीम राबविण्यात येणार आहे.
चिकन मार्केट, पोल्ट्री परिसर आणि कत्तलखान्यांमध्ये नियमित फवारणी व सॅनिटायझेशन करण्याचे आदेश देण्यात आले असून अस्वच्छता किंवा दुर्गंधी आढळल्यास संबंधितांवर कारवाई केली जाणार आहे. संशयित परिस्थिती आढळल्यास त्वरित तपासणी करणारी विशेष पथकेही नियुक्त करण्यात येणार आहेत.
नागरिकांकडून तक्रारी स्वीकारण्यासाठी हेल्पलाईन सुरू करण्याबाबतही बैठकीत चर्चा झाली. यासोबतच पूर्ण शिजवलेले अन्न सेवन करण्याबाबत जनजागृती करण्यात येणार असून बाजार परिसरात माहितीपत्रके आणि सूचना फलक लावले जाणार आहेत. रस्त्यावर किंवा सार्वजनिक ठिकाणी मृत पक्षी आढळल्यास त्यांची वैज्ञानिक पद्धतीने विल्हेवाट लावण्याचे निर्देश देण्यात आले आहेत.
“शहरातील नागरिकांच्या आरोग्याशी कोणतीही तडजोड केली जाणार नाही. प्रतिबंधात्मक उपाययोजना युद्धपातळीवर राबवाव्यात. कोणत्याही प्रकारचा हलगर्जीपणा आढळल्यास कठोर कारवाई करण्यात येईल,” असा इशारा उपमहापौर मनोज चौधरी यांनी दिला. तसेच सर्व विभागांनी समन्वय ठेवून दररोजचा अहवाल सादर करण्याच्या सूचनाही त्यांनी अधिकाऱ्यांना दिल्या.
