नांदेड ;– एकीकडे देशात संचारबंदी असताना नांदेडमध्ये संपत्तीच्या वादातून दोन सख्या चुलतभावात झालेल्या हाणामारीत चक्क गोळीबार करण्यात आला. यात एकजण ठार झाला तर दोघेजण गंभीर जखमी झाले आहेत. ही घटना नांदेड शहराच्या खुदबेनगर, देगलूरनाका परिसरात आज घडली. शहरात संचारबंदी असल्याने जखमीवर उपचार करण्यासाठी डॉक्टर उपलब्ध नसल्याने पोलिसांची व नातेवाईकांची चांगलीच दमछाक उडाली.
शहरात संचारबंदी असल्याने सर्वत्र स्मशान शांतता होती. परंतु देगलूर नाका भागात खुदबेनगर परिसरात झालेल्या गोळीबाराने नांदेड शहर दणाणले. आणि एकच गोंधळ उडाला. नांदेडच्या खुदबेनगर भागात अली जर्दावाला व गौस इनामदार या दोन चुलतभावांमध्ये संपतीचा जूना वाद होता. हा वाद मागील सहा ते सात वर्षापासून धुमसत होता. या भागातील गाडेगाव रस्त्यावर गौस इमानदार यांच्या नातेवाईकाची औषधी दुकान आहे. या दुकानासमोर सकाळी 11 वाजता गौस इनामदार व अली जर्देवाला यांच्यात वाद झाला. हा वाद काही वेळापूरता मिटला. मात्र दुपारी चारच्या सुमारास पुन्हा हे एकामेकासमोर आले. सुरवातीला हाणामारी झाली त्यानंतर पिस्तुलद्वारे गोळीबार करण्यात आला. यावेळी अली जर्देवाला याचा भाऊ महमद जुनेद हा गोळी लागल्याने जागीच ठार झाला. तर दुसरा भाऊ महमद हाजी याच्या पाठीत दोन गोळ्या लागल्याने तो गंभीर जखमी झाला. अली जर्दावाले यांनीही बचावासाठी गोळीबार केला. यात गौस इनामदार हा गंभीर जखमी झाला. घटनेनंतर जखमींना शासकीय व नंतर खासगी रुग्णालयात दाखल केले. मात्र, शस्त्रक्रिया करणारे डॉक्टर उपलब्ध नसल्याने पुन्हा जखमीना शासकिय रुग्णालयात हलवण्यात आले आहे. त्यामुळे संचारबंदी घटना घडल्याने या भागात तणावाचे व दहशतीचे वातावरण पसरले आहे. घटनेची माहिती मिळताच पोलीस अधीक्षक विजयकुमार मगर, अतिरिक्त पोलिस अधीक्षक दत्ताराम राठोड हे घटनास्थळी दाखल झालेत. सदरील घटना नांदेड ग्रामीण पोलीस ठाण्याच्या हद्दीत घडली.