नाल्यात आंघोळीस गेलेल्या तरुणांचे चार मोबाईल चोरीला
रावेर तालुक्यातील मोहमंडळी परिसरातील घटना; ४१ हजारांचा मुद्देमाल लंपास
रावेर (प्रतिनिधी) : रावेर तालुक्यातील रोझोदा येथे मोहमंडळी परिसरातील नाल्यात आंघोळीस गेलेल्या चार तरुणांचे कपड्यांमध्ये ठेवलेले मोबाईल अज्ञात चोरट्याने लंपास केल्याची घटना घडली. याप्रकरणी सावदा पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार, सोहेल बबलू पिंजारी (वय १८, रा. रोजोदा, ता. रावेर) यांनी याबाबत फिर्याद दिली आहे. दि. ३ ऑगस्ट २०२६ रोजी दुपारी ३ वाजेच्या सुमारास फिर्यादी व त्यांचे मित्र मोहमंडळी येथील नाल्यात आंघोळीसाठी गेले होते. त्यांनी आपले कपडे आणि मोबाईल नाल्याच्या काठावर ठेवले असता अज्ञात चोरट्याने संधी साधून मोबाईल चोरून नेले.
चोरीस गेलेल्या मोबाईलमध्ये Samsung A36 5G, Moto G85 5G, Oppo A5X 5G आणि Redmi 13C 5G या चार मोबाईल फोनचा समावेश असून त्यांची एकूण किंमत ४१ हजार रुपये असल्याचे फिर्यादीत नमूद करण्यात आले आहे.
या प्रकरणी भारतीय न्याय संहिता (BNS) कलम ३०३(२) अन्वये सावदा पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
या गुन्ह्याचा पुढील तपास पोलीस हवालदार मेहरबान तडवी करीत आहेत.
