महाराष्ट्र नाभिक महामंडळाच्या जळगाव जिल्हा युवा अध्यक्षपदी भरत चव्हाण यांची निवड!
प्रदेशाध्यक्ष कल्याणरावजी दळे यांच्या आदेशाने व जिल्हाध्यक्षांसह जिल्हा कार्यकारिणीच्या मान्यतेने नियुक्ती जाहीर; सामाजिक, राजकीय व पत्रकारिता क्षेत्रातील कार्याची दखल
भडगाव : महाराष्ट्र नाभिक महामंडळ, जिल्हा जळगाव यांच्या अंतर्गत जिल्हा युवा अध्यक्षपदी भडगाव येथील सामाजिक, राजकीय व पत्रकारिता क्षेत्रात सक्रिय असलेले भरत शिवाजी चव्हाण यांची निवड करण्यात आली आहे. प्रदेशाध्यक्ष कल्याणरावजी दळे यांच्या आदेशानुसार तसेच जिल्हाध्यक्ष व जिल्हा कार्यकारिणी समितीच्या मान्यतेने ही निवड अधिकृतरीत्या घोषित करण्यात आली आहे. त्यांच्या निवडीमुळे भडगावसह संपूर्ण जिल्ह्यातील नाभिक समाज बांधवांमध्ये आनंदाचे वातावरण निर्माण झाले आहे.
भरतभाऊ चव्हाण हे सामाजिक कार्यात अग्रेसर, लढाऊ, धडाडीचे आणि समाजहितासाठी सातत्याने प्रयत्नशील असलेले नेतृत्व म्हणून परिचित आहेत. कै. नानाभाऊ शिरसाठ यांच्या विचारांचे व वाटचालीचे कट्टर समर्थक म्हणूनही त्यांची ओळख आहे. समाजाच्या उन्नतीसाठी, संघटनात्मक बळकटीसाठी तसेच समाजबांधवांच्या विविध प्रश्नांना न्याय मिळवून देण्यासाठी त्यांनी सातत्याने पुढाकार घेतला आहे.
विविध पदांवर काम करण्याचा अनुभव
भरत शिवाजी चव्हाण यांनी आजवर नाभिक समाजाच्या संघटनात्मक बांधणीसाठी विविध जबाबदाऱ्या सांभाळल्या आहेत. त्यामध्ये नाभिक विकास महामंडळ, भडगाव तालुका माजी उपाध्यक्ष, महाराष्ट्र नाभिक महामंडळ जिल्हा जळगाव संपर्कप्रमुख, जिल्हा युवक उपाध्यक्ष, जिल्हा खजिनदार अशा महत्त्वपूर्ण पदांचा समावेश आहे. याशिवाय होमगार्ड भडगाव पथकातही त्यांनी कार्य केले आहे.
अखिल भारतीय ग्रामीण पत्रकार संघाचे जिल्हा जळगाव संपर्कप्रमुख म्हणूनही त्यांनी जबाबदारी सांभाळली आहे. तसेच पत्रकारिता क्षेत्रात ‘केसरी राज न्यूज’च्या माध्यमातून ते सक्रिय आहेत. सामाजिक, संघटनात्मक आणि पत्रकारिता अशा विविध क्षेत्रांतील अनुभवामुळे त्यांना समाजाच्या प्रश्नांची जाण असून, संघटनात्मक कार्याची चांगली समज आहे.
नव्या जबाबदारीतून समाजाच्या अपेक्षा वाढल्या!
‘आपण समाजाचे काहीतरी देणे लागतो’ या भावनेतून कार्य करणाऱ्या भरतभाऊ चव्हाण यांच्यावर आता जिल्हा युवा अध्यक्षपदाची महत्त्वपूर्ण जबाबदारी सोपविण्यात आली आहे. या नियुक्तीमुळे जिल्ह्यातील युवकांना संघटित करणे, समाजातील तरुणांना संघटनेच्या मुख्य प्रवाहात आणणे, सामाजिक प्रश्नांना वाचा फोडणे आणि समाजाच्या सर्वांगीण विकासासाठी नव्या जोमाने कार्य करण्याची संधी त्यांना मिळणार आहे.
त्यांच्या निवडीची घोषणा होताच जळगाव जिल्ह्यासह महाराष्ट्रातील विविध भागांतून तसेच इतर ठिकाणांहून त्यांच्यावर अभिनंदन व शुभेच्छांचा वर्षाव होत आहे. नवनियुक्त जिल्हा युवा अध्यक्ष भरत शिवाजी चव्हाण यांच्या माध्यमातून नाभिक समाजाच्या संघटनात्मक कार्याला नवी दिशा आणि बळ मिळेल, अशी अपेक्षा समाजबांधवांकडून व्यक्त होत आहे.
त्यांच्या पुढील सामाजिक व संघटनात्मक वाटचालीसाठी सर्व स्तरांतून शुभेच्छा दिल्या जात आहेत.
