विश्लेषण : मुक्ताईनगर-बोदवड मतदारसंघ
जळगाव (विशेष प्रतिनिधी) :- मुक्ताईनगर-बोदवड विधानसभा मतदारसंघात यंदा प्रमुख लढत महायुतीचे उमेदवार आ. चंद्रकांत पाटील आणि महाविकास आघाडीच्या ॲड. रोहिणी खडसे-खेवलकर यांच्यामध्ये होत आहे. मागील निवडणुकीत सुमारे दीड ते २ हजार मतांच्या फरकाने आ. पाटील यांचा विजय झाला होता. मात्र यंदा परिस्थिती बदलली असल्याची चर्चा मतदारसंघात ऐकायला मिळत असून भारतीय जनता पक्षाची भूमिका महत्वपूर्ण ठरणार आहे.
मागील पंचवार्षिक निवडणुकीत २०१९ साली अपक्ष असलेले उमेदवार आ. चंद्रकांत पाटील यांना ९१ हजार ९२ तर राष्ट्रवादी काँग्रेस पक्षाच्या ॲड. रोहिणी खडसे यांना ८९ हजार १३५ मते मिळाली होती. त्यामुळे अपक्ष चंद्रकांत पाटील यांचा सुमारे २ हजार मतांनी विजय झाला होता. यंदा चंद्रकांत पाटील यांना शिवसेना शिंदे गट यांच्याकडून तिकीट मिळाले असून ॲड. रोहिणी खडसे या राष्ट्रवादी काँग्रेस शरद पवार गटाच्या प्रदेश महिलाअध्यक्ष आहेत व या पक्षातून निवडणूक लढवित आहेत. यंदाची गंमत म्हणजे निवडणुकीत ३ रोहिणी खडसे नावाचे तर ३ चंद्रकांत पाटील नावाचे उमेदवार रिंगणात आहेत.
मतदार संघात एकूण ३ लाख ३५ हजार ३७४ मतदार असून पुरुष १ लाख ७२ हजार २३२, महिला १ लाख ६३ हजार ४१ तर १ तृतीयपंथी मतदार आहे. मुक्ताईनगर मतदारसंघ हा भाजपचा बालेकिल्ला मानला जातो. माजी मंत्री एकनाथ खडसे हे प्रभावशाली नेता राष्ट्रवादी काँग्रेस पक्ष शरद पवार गटाकडे आहेत. त्यांचे भाजपामध्ये काही जुने मित्र आहेत. त्यांची भूमिका महत्वाची ठरणार आहे. या मतदारसंघात राष्ट्रीय स्वयंसेवक संघाच्या विचारसरणीतील कार्यकर्ते आणि भाजपच्या नेत्यांची भूमिका महत्त्वपूर्ण राहणार आहे. याचबरोबर बोदवड तालुक्यात राष्ट्रवादी काँग्रेस पक्ष शरद पवार गटाचे माजी जिल्हाध्यक्ष रवींद्र पाटील यांचीही भूमिका निकालात दिसून येणार आहे.
