चाळीसगाव तालुक्यातील कोदगाव येथील घटना
जळगाव (प्रतिनिधी) : चाळीसगाव तालुक्यातील कोदगाव या ठिकाणी पत्नीने प्रेम संबंधांमध्ये अडचण ठरलेल्या पतीचा ब्लेडने वार करून डोक्यात दगड टाकून निर्घृण खून केला. त्यानंतर अपघात झाल्याचा बनाव केला. याप्रकरणी चाळीसगाव पोलिसात गुन्हा दाखल करण्यात आला असून पत्नीला व चुलत दिराला अटक करण्यात आलेली आहे.
बाळू सिताराम पवार (वय ४०, रा. न्यायडोगरी ता. नांदगाव जि. नाशिक) असे मयत तरुणाचे नाव आहे. पत्नी वंदना पवार यांच्या सोबत तो राहत होता. पती बाळू पवार हा वंदनास दारू पिऊन शिवीगाळ करून मारहाण करीत होता. या त्रासाला पत्नी कंटाळून गेली होती. तिचे चुलत दिर गजानन राजेंद्र पवार यांच्या सोबत गेल्या दोन वर्षापासून अनैतिक संबंध होते. गेल्या अनेक महिन्यांपासून अनैतिक संबंधांमध्ये पती बाळू पवार हा अडथळा ठरत होता.
प्रेमामध्ये अडचण ठरलेल्या पतीचा काटा काढण्यासाठी पत्नी वंदना व प्रियकर चुलत दीर गजानन यांच्यासोबत पतीला मारण्याचा कट रचण्यात आला. मंगळवार दि.१८ रोजी चाळीसगाव येथे पती बाळू याला घेऊन आले असता बाळूला चुलत दिर गजानन याने दारू पाजली. सायंकाळी माहेरी जात असल्याचे सांगून कन्नड येथे जायचे आहे असे पत्नी वंदनाने पती बाळूला सांगितले. बाळू याला गजानन यांच्या दुचाकीवर कोदगाव शिवारात नेले.
त्यानंतर त्या ठिकाणी पत्नी वंदना हिने बाळूच्या पोटावर ब्लेडने वार केले व डोक्यात दगड टाकून पती बाळू याला ठार मारले. तसेच कोणाला संशय येऊ नये म्हणून बाळू पवार याचा मृतदेह महामार्गावर नेऊन टाकून दिला. त्याच्या खिशात आधार कार्ड ठेवले. नंतर प्रियकर व प्रेयसी पत्नी दोघे तिथून पसार झाले.
याप्रकरणी चाळीसगाव पोलिसात खुनाचा गुन्हा दाखल करण्यात आला असून पत्नीला व चुलत दिराला अटक करण्यात आलेली आहे.
वाचून घ्या
