प्रतिबंधित पानमसाला व सुगंधित तंबाखूची वाहतूक करणाऱ्या आरोपीस अटक; बोलेरो पिकअपसह मुद्देमाल ताब्यात
मुक्ताईनगर (प्रतिनिधी) :- महाराष्ट्र राज्यात प्रतिबंधित असलेल्या पानमसाला, सुगंधित तंबाखू व गुटख्याची साठवणूक, विक्री व वाहतूक करणाऱ्यांविरोधात मुक्ताईनगर पोलिसांनी धडक कारवाई केली. या कारवाईत ११ लाख ९२ हजार ५०० रुपये किमतीचा प्रतिबंधित गुटखा, पानमसाला व बोलेरो पिकअप वाहन असा मुद्देमाल जप्त करण्यात आला असून, एका संशयित आरोपीस अटक करण्यात आली आहे.
पोलीस सूत्रांनी दिलेल्या माहितीनुसार, मुक्ताईनगर पोलीस ठाण्याचे पोलीस निरीक्षक आशिष आडसुळ यांना दिनांक ६ ऑक्टोबर २०२६ रोजी गोपनीय बातमीदारामार्फत माहिती मिळाली की, बोदवड चौफुली परिसरातून प्रतिबंधित गुटख्याची वाहतूक होणार आहे. त्यानुसार पोलिसांनी पथक तयार करून बोदवड चौफुली परिसरात संशयित वाहनांची तपासणी सुरू केली.
यावेळी पांढऱ्या रंगाचे महिंद्रा बोलेरो पिकअप वाहन क्रमांक HR-48-4073 संशयास्पदरीत्या आढळून आले. पोलिसांनी सदर वाहन थांबविण्याचा प्रयत्न केला असता वाहनचालकाने वाहन न थांबविता पुढे नेण्याचा प्रयत्न केला. पोलिसांनी पाठलाग करून वाहन अडविले आणि त्याची तपासणी केली.
तपासणीदरम्यान वाहनातून मोठ्या प्रमाणात प्रतिबंधित गुटखा, पानमसाला व सुगंधित तंबाखूजन्य पदार्थ आढळून आले. पोलिसांनी हा संपूर्ण मुद्देमाल जप्त करून वाहनही ताब्यात घेतले.
जप्त मुद्देमाल
– प्रिमियम राजनिवास सुगंधित पान मसाला – एकूण ६,७५० पाकिटे – किंमत १०,९२,५०० रुपये
– प्रिमियम जेड एन-०१ जाफरानी जर्दा – एकूण ६,००० पाकिटे – किंमत ५,७६,००० रुपये
– महिंद्रा बोलेरो पिकअप वाहन क्र. HR-48-4073 – किंमत ३,२५,००० रुपये
अशा प्रकारे एकूण ११,९२,५०० रुपये किमतीचा मुद्देमाल जप्त करण्यात आला आहे.
या प्रकरणी मुक्ताईनगर पोलीस ठाणे गु.र.नं. ३३१/२०२६ अन्वये भारतीय न्याय संहिता तसेच अन्न सुरक्षा व मानके कायद्यातील विविध कलमांनुसार गुन्हा दाखल करण्यात आला आहे. आरोपीस अटक करण्यात आली असून पुढील तपास सुरू आहे. प्रेस नोअ क्र. 169 मुक्ताईनगर प…
जप्त करण्यात आलेला गुटखा व पानमसाला कोणाकडून आणण्यात आला होता तसेच या अवैध व्यवसायामध्ये आणखी कोणाचा सहभाग आहे का, याबाबत पोलिसांकडून तपास करण्यात येत आहे.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावित, उपविभागीय पोलीस अधिकारी नंदराज पाटील यांच्या मार्गदर्शनाखाली मुक्ताईनगर विभागाचे उपविभागीय पोलीस अधिकारी, पोलीस निरीक्षक आशिष आडसुळ व त्यांच्या पथकाने केली. पथकात पोलीस कर्मचारी तुषार पाटील, रविंद्र धनगर, प्रशांत चौधरी आदींचा सहभाग होता.
मुक्ताईनगर पोलिसांच्या या कारवाईमुळे अवैध गुटखा वाहतूक करणाऱ्यांमध्ये खळबळ उडाली असून, अशा अवैध धंद्यांविरोधात कारवाई सुरूच राहणार असल्याचे पोलिसांनी स्पष्ट केले आहे.
