सुट्टीच्या दिवशीही मनपा कार्यालये राहणार सुरू
जळगाव ( प्रतिनिधी ) – महानगरपालिकेच्या मालमत्ता कर संकलन व निर्धारण विभागाकडून नागरिकांसाठी विशेष सवलत योजना जाहीर करण्यात आली आहे. सन २०२६-२७ या आर्थिक वर्षासाठी मालमत्ता कर आणि पाणीपट्टीचा संपूर्ण वर्षाचा कर ३१ मे २०२६ पर्यंत भरल्यास शासनाचे कर वगळून देय रकमेवर १० टक्के सूट दिली जाणार आहे.
करदात्यांसाठी विशेष व्यवस्था
दि. २८ मे, ३० मे आणि ३१ मे रोजी शासकीय सुट्टी असल्यामुळे करदात्यांना कोणतीही अडचण येऊ नये यासाठी महानगरपालिकेने विशेष व्यवस्था केली आहे. प्रभाग समिती क्रमांक १ ते ४ ची कार्यालये या दिवशीही नियमित सुरू ठेवण्यात येणार असून मालमत्ता कराचा भरणा स्वीकारला जाणार आहे.
नागरिकांना आवाहन
महापालिका प्रशासनाने शहरातील जास्तीत जास्त मिळकतधारकांनी या सवलतीचा लाभ घ्यावा, असे आवाहन केले आहे. वेळेत कर भरून प्रशासनाला सहकार्य करावे तसेच सवलतीचा फायदा घेऊन आर्थिक बचत करावी, असेही प्रशासनाने स्पष्ट केले आहे.
कर संकलन वाढविण्यावर भर
चालू आर्थिक वर्षात कर संकलन वाढविण्यासाठी महानगरपालिका विविध उपाययोजना राबवत आहे. त्याचाच एक भाग म्हणून नागरिकांना वेळेत कर भरण्यास प्रोत्साहन देण्यासाठी ही १० टक्के सवलत योजना लागू करण्यात आली आहे.
