संशयित भावेश पाटील यांना २ गुन्ह्यात जामीन मंजूर
जळगाव (प्रतिनिधी) :- महानगरपालिकेच्या पाईप चोरी प्रकरणी दाखल गुन्ह्यांमध्ये माजी विरोधी पक्षनेता सुनील सुपडू महाजन यांच्या अटकपूर्व जामिनावर जळगावच्या न्यायालयात सोमवारी दि. ६ जानेवारी रोजी सुनावणी झाली. यावेळी न्या. वावरे यांनी सुनील महाजन यांचे तिन्ही गुन्ह्यातील अटकपूर्व जामीन फेटाळले आहेत. तर संशयित भावेश पाटील यांच्यावर दाखल दोन्ही गुन्ह्यात न्यायालयाने जामीन मंजूर केला आहे. यापूर्वी आणखी एका दाखल गुन्ह्यात पाटील यांना जामीन मंजूर आहे.
शहराला पाणीपुरवठा करणाऱ्या बिडाचे पाईप चोरी प्रकरणी मनपाचे माजी विरोधी पक्षनेते सुनिल सुपडू महाजन यांच्यासह ७ जणांविरुद्ध रामानंद नगर पोलीस ठाण्यात १ तर तालुका पोलीस ठाण्यात २ असे एकूण ३ गुन्हे दाखल आहेत.(केसीएन)याप्रकरणी आतापर्यंत ४ जणांना अटक करण्यात आली असून उर्वरीत मात्र अद्याप फरार आहे. मुख्य संशयित सुनिल महाजन यांनी न्यायालयात अटकपुर्व जामीनासाठी अर्ज दाखल केला होता. त्या अर्जावर बुधवारी न्या. वावरे यांच्या न्यायालयात कामकाज पार पडले. दोन्ही पक्षाचा युक्तिवाद ऐकल्यावर आता सोमवारी पुढील सुनावणी झाली.
गुन्ह्याचा तपास करतांना पोलिसांनी मुख्य संशयित सुनिल महाजन यांच्या मोबाईलचा सीडीआरद्वारे तपासला असता, त्यामध्ये महाजन यांनी भंगार ठेकेदार सादीक खाटीकसोबत १४१ वेळा, अक्षय अग्रवालसोबत ७३६ वेळा, कुंदन पाटीलसोबत ५४७ वेळा तर निरंजन पाटीलसोबत १०५७ वेळा त्यांचे संभाषण झाल्याचे उघड झाले आहे.(केसीएन)पाईप चोरी प्रकरणातील मुख्य संशयित सुनिल महाजन यांच्याविरुद्ध दाखल असलेल्या तिन्ही गुन्ह्यांमध्ये अटकपुर्व जामीनासाठी तसेच रामानंद व तालुका पोलीस ठाण्यात दाखल असलेल्या पाईप चोरीच्या गुन्ह्यातील संशयित सादीक खाटीक, कुंदन पाटील व भावेश पाटील यांच्या जामीन अर्जावर देखील न्या. बी. एस. वावरे यांच्या न्यायालयात युक्तीवाद झाले.
दोन्ही पक्षांचे युक्तीवाद ऐकून घेतले होते.(केसीएन)आता आज सोमवारी दि. ६ जानेवारी रोजी सुनील महाजन यांचे तिन्ही गुन्ह्यातील अटकपूर्व जामीन अर्ज न्या. एस. बी. वावरे यांनी फेटाळले. सुनील महाजन यांच्या वतीने ॲड. जैनोद्दीन शेख व ॲड. सागर चित्रे यांनी काम पाहिले. तर भावेश पाटील यांच्यातर्फेदेखील ॲड. शेख यांनी कामकाज केले. तर दोन्ही प्रकरणात सरकारी वकील म्हणून ॲड. सुरेंद्र काबरा यांनी बाजू मांडली होती. अटकपूर्व अर्ज नामंजूर झाल्यावर आता सुनील महाजन यांच्यावतीने उच्च न्यायालयात दाद मागितली जाईल अशी माहिती ‘केसरीराज’ शी बोलताना ॲड. जैनोद्दीन शेख यांनी दिली.
