भुसावळ तालुक्यातील फुलगाव येथील घटना
भुसावळ (प्रतिनिधी) : येथून जवळच असलेल्या फुलगाव येथील तिघांना पिसाळलेल्या कुत्र्याने चावा घेतला होता. यापैकी एक तरुण हा गंभीर अवस्थेत होता. शासकीय वैदयकीय महाविद्यालय व रुग्णालयात उपचार घेताना त्याचा मृत्यू झाला. घटनेप्रकरणी संबंधित पोलीस स्टेशनला नोंद करण्यात आली आहे.
भुसावळ तालुक्यातील फुलगाव येथे २२ ऑगस्ट रोजी एका मोकाट पिसाळलेल्या कुत्र्याने दोघांना चावा घेतला. याच दिवशी फुलगाव उड्डाण पुलालगत कुत्र्याने झोपलेल्या एका ६० वर्षीय इसमाच्या तोंडावर चावा घेतला होता व नंतर या मोकाट कुत्र्यांनी आपला मोर्चा फुलगाव गावाकडे वळवला व त्याच कुत्र्याने गणेश देवराम सोनवणे (वय ३०) या युवकाला चावा घेतला होता. यामुळे गणेश सोनवणे याला तातडीने जळगांवला जिल्हा सामान्य रुग्णालयात उपचारार्थ दाखल करून तेथील एक दिवसाच्या उपचारानंतर वैद्यकीय अधिकाऱ्यांनी त्याला घरी जावून औषधोपचार घेण्याचा जाण्याचा सल्ला दिला.
मात्र, १८ दिवसानंतर गणेश सोनवणेला सोमवारी रात्री अचानक जास्त प्रमाणात त्रास होऊ लागल्याने त्याला पुन्हा जिल्हा सामान्य रुग्णालयात उपचारार्थ दाखल करण्यात आले. मात्र, त्याठिकाणी गणेशची मृत्यूशी झुंज अपयशी ठरली व १० रोजी अखेर त्याचा मृत्यू झाला. यामुळे फुलगावसह परिसरात मोकाट श्वानांबाबत मोठ्या प्रमाणात भीतीचे वातावरण पसरले आहे.
मयत गणेशच्या पश्चात पत्नी, दोन मुली, मुलगा, आई-वडील असा परिवार असून सर्वसाधारण कुटुंबातील कर्ता पुरुष गेल्याने गावात हळहळ व्यक्त होत आहे. मोकाट पिसाळलेल्या कुत्र्यांनी तीन इसमांसह गावातीलच एका बकरी व म्हशीला सुद्धा चावा घेतला होता. या चाव्यामुळे बकरी व म्हशीचाही मृत्यू झाल्याने जनावरे पाळणाऱ्या शेतकऱ्यांमध्ये घबराटीचे वातावरण निर्माण झाले आहे.
