चोरीच्या संशयातून जुन्या वादाची रक्तरंजित परिणती; तिघांविरुद्ध गुन्हा दाखल
जळगाव (प्रतिनिधी) – बोदवड शहरातील हिदायत नगर परिसरात एका 38 वर्षीय तरुणाचा धारदार शस्त्राने वार करून खून करण्यात आल्याची धक्कादायक घटना उघडकीस आली आहे. या प्रकरणी बोदवड पोलिसांनी तिघांविरुद्ध खुनाचा गुन्हा दाखल केला असून पुढील तपास सुरू आहे.
पोलिसांनी दिलेल्या माहितीनुसार, अनसार शेखलाल पिजारी (वय 38, रा. हिदायत नगर, बोदवड) असे मयताचे नाव आहे. दिनांक 20 मे 2026 रोजी दुपारी सुमारे 1 वाजेच्या सुमारास ही घटना घडली. हिदायत नगर परिसरातील फिर्यादीच्या घरासमोर सार्वजनिक ठिकाणी आरोपींनी अनसार पिजारी यांच्यावर धारदार शस्त्राने हल्ला केला. या प्रकरणी अफसाना बी अनसार पिजारी (वय 30) यांनी बोदवड पोलीस ठाण्यात फिर्याद दिली आहे. त्यानुसार, आरोपी अरबाज लतीफ शाह, मोहम्मद हारुण शाह आणि इस्माईल इस्माईल शाह (सर्व रा. बोदवड) यांच्या विरोधात गुन्हा दाखल करण्यात आला आहे.
पोलिसांच्या माहितीनुसार, 8 मे 2026 रोजी फिर्यादीच्या घरात चोरी झाली होती. त्या चोरीप्रकरणी संशयित म्हणून अरबाज शाह याचे नाव पोलिसांना सांगण्यात आले होते. याच कारणावरून आरोपींनी मनात राग धरून अनसार पिजारी यांच्यावर प्राणघातक हल्ला केल्याचा आरोप फिर्यादीत करण्यात आला आहे. घटनेच्या दिवशी आरोपी फिर्यादीच्या घरासमोर आले. त्यानंतर अनसार पिजारी यांच्यावर चाकूने पोटावर, छातीवर आणि मानेवर सपासप वार करण्यात आले. गंभीर जखमी अवस्थेत त्यांना उपचारासाठी हलविण्यात आले; मात्र त्यांचा मृत्यू झाला.
या प्रकरणी बोदवड पोलीस ठाण्यात गुन्हा क्रमांक 102/2026 अन्वये भारतीय न्याय संहिता कलम 103(1), 3(5) प्रमाणे खुनाचा गुन्हा दाखल करण्यात आला आहे. घटनेची माहिती मिळताच वरिष्ठ पोलीस अधिकाऱ्यांनी घटनास्थळी भेट दिली. या प्रकरणाचा पुढील तपास पोलीस अधिकारी अमितकुमार बागुल करीत असून आरोपी अद्याप फरार आहेत.
