जालना ( प्रतिनिधी ) – कौटुंबिक वादातून विवाहितेने चार लेकरांसह आत्महत्या केली. जालना जिल्ह्यात अंबड तालुक्यातील घुंगर्डे हादगाव येथे ही घटना घडली आहे. तीन मुली आणि एका मुलासह महिलेने विहिरीत उडी घेऊन आयुष्याची अखेर केली. या घटनेने हळहळ व्यक्त करण्यात येत आहे.
पार्वती (नाव बदलले आहे) या विवाहित महिलेने तीन मुली आणि एका मुलासोबत आत्महत्या केली. 30 डिसेंबररोजी दुपारी पार्वती आपल्या तीन मुली आणि लेकासह शेतात चक्कर मारायला गेल्याचं अनेकांनी पाहिलं होतं. पार्वती यांनी मुला-मुलींसह सायंकाळी साडे पाच वाजेपर्यंत शेतातच वेळ घालवला.
संध्याकाळचे सात वाजले, तरीही पार्वती आणि चारही लेकरं घरी परत आली नाहीत. त्यामुळे त्यांचे पती आणि गावातील नागरिकांनी त्यांचा शोध घेण्यास सुरुवात केली. रात्री उशिरापर्यंत त्यांचा शोध घेऊनही ते कुठेच सापडले नाहीत. परिसरातील सर्व विहिरी आणि जायकवाडी डावा कालवा परिसर पिंजून काढला, मात्र पाचही जण आढळून आले नाहीत.
रात्र झाली तरीही घरी न आल्यामुळे कुटुंबीय आणि गावातील काही लोकांनी त्यांचा शोध सुरू केला. गावकरी आणि कुटुंबातील सदस्यांनी आजूबाजूची शेतं आणि विहिरी पिंजून काढल्या. त्यानंतर रात्रभर शोध घेऊनही ते सापडले नव्हते. परंतु सकाळीच काही जणांच्या नजरेत त्यांच्या शेताच्या शेजारच्या विहिरीत या पाचही जणांचे मृतदेह पाण्यावर तरंगताना आढळून आले.
