यावल (प्रतिनिधी) : इंस्टाग्रामवर शिवीगाळ करणारा व्हिडिओ बनवल्याच्या वादातून, यावल-शेळगाव बॅरेज रस्त्यावर एका १८ वर्षीय तरुणाची निर्घृण हत्या करण्यात आल्याची धक्कादायक घटना २ डिसेंबर रोजी सायंकाळी घडली आहे. मृत तरुणाचे नाव तुषार चंद्रकांत तायडे (वय १८, रा. समता नगर, जळगाव) असून, उपचारादरम्यान त्याचा मृत्यू झाला. या घटनेमुळे परिसरात मोठी खळबळ उडाली असून, तुषारच्या नातेवाईकांनी जिल्हा रुग्णालयात प्रचंड आक्रोश व्यक्त केला.
मयत तुषार तायडे याने काही दिवसांपूर्वी इंस्टाग्रामवर शिवीगाळ करणारा व्हिडिओ बनवला होता. याच व्हिडिओचा राग मनात ठेवून ही घटना घडली.संशयित राहुल सोनवणे, विक्रम सोनवणे (दोघेही रा. जळगाव) आणि त्यांच्यासोबत असलेले इतर सहा ते सात अनोळखी व्यक्तींनी मिळून हा हल्ला केला असल्याचे फिर्यादीत नमूद करण्यात आले आहे. तुषार तायडे हा यावल तालुक्यातील परसाडे येथील नातेवाइकाच्या अंत्यविधीवरून मित्राच्या दुचाकीवरून जळगावकडे परतत असताना, यावल–बोरावल मार्गावरील पाण्याच्या पाटाजवळील शेळगाव बॅरेज रस्त्यावर त्याचा रस्ता अडवण्यात आला.आरोपींनी तुषारला लाथाबुक्क्यांनी आणि लाकडी काठ्यांनी बेदम मारहाण केली.
गंभीर जखमी झालेल्या तुषारला तातडीने ग्रामीण रुग्णालयात नेण्यात आले. तेथील डॉक्टरांनी पुढील उपचारासाठी त्याला जळगाव शासकीय वैद्यकीय महाविद्यालयात हलवण्याचा सल्ला दिला. मात्र, ३ डिसेंबरच्या मध्यरात्री उपचारादरम्यान तुषारचा मृत्यू झाला.
या प्रकरणी मृत तुषारचे वडील चंद्रकांत तायडे यांनी यावल पोलिसात फिर्याद दिली आहे. त्यानुसार, राहुल सोनवणे, विक्रम सोनवणे आणि इतर अनोळखी आरोपींविरुद्ध खुनाचा गुन्हा नोंदवण्यात आला आहे. यावल पोलीस या प्रकरणाचा पुढील तपास करत आहेत.
