जळगाव मध्यवस्तीतील गोलाणी मार्केट येथील घटना
वाढती गुन्हेगारी ठरते पोलिसांना डोकेदुखी
जळगाव (प्रतिनिधी) : शहरातील हरीविठ्ठल नगर परिसरात राहत असलेल्या तरुणाचा गोलाणी मार्केटच्या तळमजल्यावर गांजा पित असलेल्या तरुणांमध्ये वाद झाल्यानंतर एका तरुणाचा चोपरने वार करून निर्घृण खून करण्यात आल्याची घटना रविवार दि.२६ मार्च रोजी रात्री १० वाजेनंतर घडली आहे. घटनेप्रकरणी पोलिसांनी ६ आरोपी निष्पन्न केले असून अटक केली आहे.
सोपान बबन हटकर (वय ३५, रा. हरी विठ्ठल नगर) असे मयत तरुणाचे नाव आहे. गोलाणी मार्केट येथे रात्री ९ वाजेच्या सुमारास ज्ञानेश्वर लोंढे (रा. कंजरवाडा) रोहित भट (रा.खोटे नगर) यांच्यासह पिंटू परदेशी व इतर तीन हे तळमजल्यावर गांजा पीत बसले होते. तेथे मयत सोपान हटकर आला. त्या ठिकाणी त्यांच्यात काहीतरी वाद झाला. नंतर मारामारी झाली.
रोहित भट यांच्याकडे चॉपर आहे, हे ज्ञानेश्वरला माहीत होते. हाणामारी होत असताना ज्ञानेश्वर लोंढे याने रोहित याच्याकडील चोपर हिसकावून घेत सोपान हटकर याच्यावर वार केले. वादाचे पर्यवसान सोपान हटकर याचा चॉपरने वार करून निर्घृण खून करण्यात आले आहे.
घटनेची माहिती मिळताच शहर पोलीस स्टेशनच्या कर्मचाऱ्यांनी घटनास्थळी धाव घेतली. घटनास्थळी चोपरचे कव्हर पोलिसांना मिळाले आहे. मयत तरुणाचा मृतदेह शासकीय वैद्यकीय महाविद्यालय व रुग्णालय, जळगाव या ठिकाणी हलविण्यात आला. पोलिसांनी रात्रीच संशयितांचे नावे निष्पन्न करून त्यांना अटक केली. त्यानंतर त्यांना आता शहर पोलीस स्थानकात जमा करण्यात आले आहे.
स्थानिक गुन्हे शाखेचे पो.नि. नजन पाटील,पोलिस उपनिरीक्षक देवळे, शेवंगे, चौबे,पोलिस हे. काॅ. संजय हिवरकर,विजयसिंग पाटील, सुधाकर अंभोरे ,राजेश मेंढे, ,अक्रम शेख, विजय पाटील, आश्रफ शेख, कमलाकर बागुल, संतोष मायकल, महेश महाजन यांनी सदर आरोपींना पकडण्यात यश मिळवले.
दरम्यान, जिल्ह्यात सातत्याने खुनाच्या घटना घडत आहेत. जिल्हा पोलीस दलाने याबाबत कठोर कार्यवाही करण्याची अपेक्षा नागरिकांकडून व्यक्त केली जात आहे.
