खुनाच्या घटनेमुळे जळगावात भयाचे वातावरण
जळगाव (प्रतिनिधी) शहरातील कालिका माता मंदिर परिसरातील हॉटेल भानू येथे बुधवारी दि. २२ मे रोजी रात्री नऊ ते दहा वाजेच्या सुमारास किशोर अशोक सोनवणे या तरुणाच्या खून प्रकरणी शनिपेठ पोलिसांनी चार संशयित आरोपींना अटक केली आहे. तर इतर संशयित आरोपींच्या मागावर पथके रवाना करण्यात आली आहे. दरम्यान खुनाच्या घटनेमुळे जळगावात अजूनही भयाचे वातावरण आहे.
अशोक श्रावण सोनवणे (वय ६०, रा. प्रबोधन नगर, हॉटेल साई पॅलेसच्या मागे,जळगाव) यांनी फिर्याद दिली आहे. ते रिक्षा चालवून परिवाराचा उदरनिर्वाह करतात. पत्नी लताबाई, मुलगा किशोर, सून काजल आणि नात दिव्यांशी यांच्यासोबत राहतात. त्यांना बुधवार दि. २२ मे रोजी रात्री १० वाजेच्या सुमारास मुलगा किशोर याचा मित्र अमोल सोनार उर्फ गप्या याचा फोन आला. त्याने सांगितले की, हॉटेल भानू, कालिका माता मंदिराजवळ येथे कीशोरला काही जणांनी मारहाण केली आहे व त्यात तो बेशुद्ध झाला आहे. आणि त्याला सिव्हिल हॉस्पिटल येथे घेऊन चाललो आहोत. त्यानंतर फिर्यादी अशोक सोनवणे हे त्यांच्या परिवारासह सिव्हिल हॉस्पिटल येथे गेले. तेथे त्यांना कीशोरच्या मित्रांनी हकीगत सांगितली.
रात्री ८ वाजता अमोल सोनार उर्फ गप्या यांच्या घराजवळ किशोर सोनवणे आणि त्याचे पाच ते सहा मित्र हे गप्पा मारत उभे होते. त्यावेळेला त्यांनी हॉटेल भानू येथे जेवायला जाण्याबाबत प्लॅन बनवला. रात्री ९ वाजता ते हॉटेल भानू येथे जेवणासाठी गेले. थोड्या वेळात किशोर सोनवणे याला कोणाचा तरी फोन आला. फोन घेऊन तो बाहेर गेला. बाहेर एका चायनीजच्या गाडीवरील रुपेश काकडे नामक तरुणाशी त्याचा वाद झाला. अमोल सोनार उर्फ गप्या आणि त्याच्या मित्रांनी तो वाद सोडवून त्याला पुन्हा हॉटेल भानू येथे घेऊन आले. तेथे आम्ही जेवण करीत असताना दहा ते अकरा जण आलेत.
त्यांनी किशोर सोनवणे याला धरून धारदार शस्त्राने आणि लोखंडी दांड्याने मारहाण करण्यास सुरुवात केली. तसेच त्याला ओढत ओढत हॉटेलच्या दरवाजेपर्यंत आणले आणि तिथून पळून गेले. अमोल सोनार व त्याच्या मित्रांनी पाहिले तर किशोर सोनवणे बेशुद्ध झाला होता. त्याला उचलून तातडीने त्यांनी सिव्हिल हॉस्पिटल येथे आणले. तेथे डॉक्टरांनी त्याला मयत घोषित केले होते. त्यानंतर किशोरचे वडील अशोक सोनवणे यांनी शनिपेठ पोलीस स्टेशनला येऊन फिर्याद दाखल केली आहे.
त्यानुसार संशयित आरोपी रुपेश मनोहर सोनार, निलेश उर्फ लोमेश युवराज सपकाळे, आकाश युवराज सपकाळे, मयूर विनोद कोळी, ईश्वर सुभाष काकडे, रुपेश सुभाष काकडे (सर्व रा. मोहन टॉकीज परिसर, आसोदा रोड, जळगाव), दुर्लभ कोळी (सुनसगाव ता. जळगाव) आणि अमोल छगन सोनवणे (श्रीराम कॉलनी, जळगाव) यांच्यासह अनोळखी तीन इसम यांच्याविरुद्ध गुन्हा दाखल करण्यात आला आहे. शनिपेठ पोलिसांनी आणि एलसीबी पोलिसांनी कसून तपास केला. यामधील चार संशयित आरोपींना अटक करण्यात आली आहे.
त्यामध्ये प्रशांत सुभाष काकडे (वय ३०), रुपेश सुभाष काकडे (वय २७), ईश्वर सुभाष काकडे (वय २३), मयूर विनोद कोळी ( वय २१, सर्व रा. आसोदा रोड, मोहन टॉकीज जवळ, जळगाव) यांना अटक करण्यात आलेली असून त्यांची विचारपूस सुरू आहे. दरम्यान खुनाच्या खळबळजनक घटनेमुळे जळगाव हादरले आहे. पुढील तापास सुरू आहे