गिरीश महाजन यांच्याकडे वैद्यकीय शिक्षण, ग्रामविकास तर गुलाबराव पाटील यांच्याकडे पुन्हा पाणीपुरवठा खाते
जळगाव (प्रतिनिधी) – राज्यात एकनाथराव शिंदे आणि देवेंद्र फडणवीस यांचे सरकार अस्तित्वात आले आहे. त्यांच्या सरकारमधील १८ मंत्र्यांनी कॅबिनेट पदाची शपथ देखील घेतली आहे. मात्र मंत्र्यांना खाते वाटप झाले नव्हते. रविवारी १४ ऑगस्ट रोजी खाते वाटपाची यादी राजभवनात सादर झाली आणि ती मंजूर देखील झाल्याची माहिती मिळाली आहे. यामध्ये जिल्ह्यातील कॅबिनेट मंत्री गिरीश महाजन यांना पूर्वीचे वैद्यकीय शिक्षण व संशोधन खाते आणि ग्रामविकास तर दुसरे कॅबिनेट मंत्री गुलाबराव पाटील यांना पूर्वीचेच खाते पाणीपुरवठा व स्वच्छता मंत्री हे कायम राहिले आहे. गृहमंत्री पद उपमुख्यमंत्री देवेंद्र फडणवीस यांच्याकडे तर एकनाथ शिंदे यांच्याकडे नगर विकास मंत्री पद कायम आहे.
यादीनुसार एकनाथ शिंदे यांच्याकडे सामान्य प्रशासन, शहर विकास, माहिती आणि तंत्रज्ञान, माहिती व जनसंपर्क, वाहतूक, मार्केटिंग, सामाजिक न्याय, आपत्ती व्यवस्थापन, मदत व पुनर्वसन, पर्यावरण आणि वातावरण बदल, अल्पसंख्यांक आणि औकाफ मंडळ मंडळ तर देवेंद्र फडणवीस यांच्याकडे गृह, अर्थ व वित्त नियोजन, विधी विभाग, ऊर्जा खाते, गृहनिर्माण हे खाते आले आहेत.
राधाकृष्ण विखे पाटील यांच्याकडे महसूल, पशु व दुग्ध संवर्धन विभाग, सुधीर मुनगंटीवार यांच्याकडे वन, सांस्कृतिक, मत्स्य विकास हे विभाग, चंद्रकांत पाटील यांच्याकडे उच्च व तंत्र शिक्षण, संसदीय कार्यमंत्री तर विजयकुमार गावित यांच्याकडे आदिवासी विकास हे खाते आले आहे.
गिरीश महाजन यांच्याकडे ग्रामीण विकास आणि पंचायती राज, वैद्यकीय शिक्षण व संशोधन आणि क्रीडा व युवक कल्याण विभाग, गुलाबराव पाटील यांच्याकडे पाणीपुरवठा व स्वच्छता खाते, दादा भुसे यांच्याकडे खार बंदरे आणि खाणकाम, संजय राठोड यांच्याकडे अन्न व औषध प्रशासन, सुरेश खाडे यांच्याकडे कामगार खाते, संदिपान भुमरे यांच्याकडे रोजगार हमी योजना व फलोत्पादन, उदय सामंत यांच्याकडे उद्योग खाते, तानाजी सावंत यांच्याकडे आरोग्य व कुटुंबकल्याण खाते, रवींद्र चव्हाण यांच्याकडे अन्न व नागरी पुरवठा आणि ग्राहक संरक्षण, अब्दुल सत्तार कृषी मंत्री, दीपक केसरकर शालेय शिक्षण आणि मराठी भाषा विकास, अतुल सावे यांच्याकडे इतर मागासवर्गीय आणि बहुजन विकास, शंभूराजे देसाई यांच्याकडे राज्य उत्पादन शुल्क, मंगल प्रभात लोढा यांच्याकडे पर्यटन कौशल्य विकास व उद्योजकता आणि महिला व बालविकास हे खाती देण्यात आले आहे.